Қўшимча 31,7 минг бола қамраб олинади
Мактабгача таълим вазирлиги ташаббуси билан Президентимизнинг 2020 йил 30 январдаги “Мактабгача таълим соҳасида давлат-хусусий шерикликни янада ривожлантириш чора-тадбирлари тўғрисида”ги қарори ижросига бағишланган матбуот анжумани бўлиб ўтди.
Тадбирда вазирлик томонидан шу кунгача нодавлат мактабгача таълим ташкилотларини (МТТ) ташкил этиш учун 1412 та битимлар имзоланган бўлса, шундан 992 та лойиҳага 1 732 миллиард сўмлик имтиёзли кредитлар ажратилди. Жорий йилнинг 1 январь ҳолатига кўра, 6084 оилавий шаклдаги МТТ ҳам ўз фаолиятини бошлаганлиги маълум қилинди.
— Ҳозирги кунда 300 та МТТларда қурилиш-жиҳозлаш ишлари олиб борилмоқда, — дейди Мактабгача таълим вазири ўринбосари Мақсуджон Юлдошев. — Натижада қўшимча 31,7 минг бола қамраб олиниши режалаштирилган.
Давлатимиз томонидан тадбиркорларга қулай имкониятлар яратилган, хусусан, айнан шу соҳада фаолият олиб бораётган тадбиркорлар 10 йилгача солиқлардан озод этилган бўлиб, МТТларда сарфланаётган электр энергия ва газ харажатларининг 50 фоизи давлат томонидан қопланади. Ўтган йилда давлат-хусусий шерикликни янада ривожлантириш мақсадида Ўзбекистон Республикаси Тикланиш ва тараққиёт жамғармаси ҳамда ҳалқаро молия институтларидан 200,0 миллион АҚШ доллари миқдоридаги кредит маблағи жалб қилинди.
Наргиза Бобомуродова,
“Hurriyat” мухбири.