Mukofot — 50 000 AQSh dollari!

Prezidentimizning Oliy Majlisga Murojaatnomasida belgilab berilgan ustuvor vazifalar ijrosini ta'minlash hamda O'zbekiston Respublikasi Oliy Majlisi Qonunchilik palatasi va O'zbekiston Respublikasi Oliy Majlisi Senati Kengashining 2019 yil 14 sentyabrdagi “To'ylar, oilaviy tantanalar, ma'raka va marosimlar o'tkazilishini tartibga solish tizimini yanada takomillashtirish to'g'risida”gi qo'shma qarori ijrosini ta'minlash maqsadida “O'zbekkonsert” davlat muassasasi tomonidan  Samarqand shahrida “Rahbar kadrlarning estrada san'atini rivojlantirishda, ayniqsa, yoshlar tarbiyasidagi o'rni: muammo, yechim va istiqboldagi vazifalar” mavzui­da ilmiy-amaliy anjuman bo'lib o'tdi.

Anjumanda “O'zbekkonsert” davlat muassasasi rahbari Odiljon Abduqahhorov estrada san'ati oldida turgan ayrim muammolar, ularning yechimi, xonandalarning odob-axloqi, to'ylarda ijro etilayotgan aksariyat qo'shiqlarning milliy mentalitetimizga to'g'ri kelmasligi, xonandalarning beo'xshov xatti-harakatlari, shov­qin-suronning avj olib ketishi va boshqa muammolar, kamchiliklar haqi­da  so'z yuritdi.

Jumladan: “Ba'zan to'y-hashamlarga litsenziyasiz san'atkorlar ham  borib qolayapti. Buning oldini olish, ular bilan tegishli tartibda shartnoma tuzishda ijro mahoratini belgilash kechiktirib bo'l­maydigan vazifalar sirasiga kiradi. Yosh iste'dodlarni izlab topish hamda kashf etishda jonli ijroning ahamiyati, savodxonlikni kuchaytirish, xonandalarning ijodiy fao­liya­tida, ularning repertuarini asl qo'shiqlar bilan boyitish, pishiq, xalqchil va g'oya­viy-badiiy jihatdan mukammal she'r tanlashlarini nazoratga olish, ularga yaqindan ko'maklashishni kuchaytirishimiz kerak”, — dedi O.Abduqahhorov.

Ayni paytda, iste'dodli talabalar va yorqin ovoz egalari bo'lgan yoshlar uchun “O'zbek­konsert” davlat muassasasiga tegishli ovoz yozish studiyalari haftaning har seshanba va juma kunlari bepul xizmat ko'rsatishi yo'lga qo'yilgan. Iste'dodli talaba-yoshlarni qo'l­lab-quvvatlash maqsadida o'z faoliyatini qonuniy asosda boshlashlari uchun bepul litsenziyalar taqdim etilayotir.

Shuningdek, anjumanda “Milliy” telekanali bilan hamkorlikda yurtimizda ilk bor “Asian Top Band” xalqaro musiqiy loyi­hasi doirasida kasting va saralash bosqichlari o'tkazilayotgani, mazkur loyihada g'olib bo'lganlar festivalning 50 000 AQSh dollari miqdoridagi pul mukofotiga ega bo'lishi ma'lum qilindi.

Anjuman yakunida ishtirokchilar mutasaddilardan o'zlarini qiziqtirgan savollarga javob olishdi.

“O'zbekkonsert” davlat

muassasasi matbuot xizmati.

Javob qoldiring

Email manzilingiz chop etilmaydi. Majburiy bandlar * bilan belgilangan

20 − seven =