Афсона бўлгай…

Сенинг пойингда юрт гулхона бўлгай,

Муҳаббат аҳлига кошона бўлгай!

Қуёшинг қувнагай бахтимни қучса,

Ҳама ошиқларинг шарқона бўлгай!

Дилим чақмоқ чақиб, ишқингда ёнса,

Ғанимлар ғам чекиб бегона бўлгай!

Самода чарх урар оққушларингга

Битилган байтларим дўстона бўлгай!

Севинчим сиғмагай гоҳо дилимда,

Жаҳон тинчлик аро тинчхона бўлгай!

Яратган ишқида куйган гиёҳман,

Ҳамал кўнгил сўраб, ҳамхона бўлгай!

Ўзиб кетмоқдадирман ўзлигимдан,

Суянчим, ўз элим, мардона бўлгай!

Онамни сийлаган осуда тупроқ

Менинг қалбимда ҳам остона бўлгай!

Қувончим, навқироним, Ўзбекистон,

Қучоғи нурга тўлган Она бўлгай!

Буюк Соҳибқирон ёққан чироғи

Адолат мулкига Туркона бўлгай!

Замонам тинчлигин қутлайди дунё,

Энг одил Раҳнамо парвона бўлгай!

Ёниб Ахтамқули суйган заминда

Ҳумо ҳайратланиб, афсона бўлгай!

АХТАМҚУЛИ