Тараққиёт, инновация ва халқ фаровонлиги сари муҳим қадамлар
Шу йилнинг 1-2 май кунлари Президентимизнинг Хоразм вилоятига қилган навбатдаги ташрифидан кейинги ўйлар
Ўзбекистон Республикаси Президенти Шавкат Мирзиёевнинг иқтисодиёт тармоқлари, ижтимоий соҳалар ва маҳаллаларда олиб борилаётган ишлар билан танишиш, янги объект ва лойиҳаларни ишга тушириш, шунингдек, вилоятни ижтимоий-иқтисодий жиҳатдан янада ривожлантириш мақсадида Хоразм вилоятига ташрифи хоразмликлар учун унутилмас тарихий кун ҳисобланади.
Боиси кейинги йилларда давлатимиз томонидан амалга оширилаётган жамики ислоҳотлар инсон ва унинг қадр-қиммати учун хизмат қилаётганини бугун барчамиз ўз ҳаётимиз мисолида кўриб, англаб, ҳис қилмоқдамиз.
Биргина Хоразм вилоятида амалга оширилаётган кенг кўламли ишлар натижасида унинг ҳар бир ҳудудида янгиликлар, бунёдкорликлар ва ривожланишни кўриш мумкин. Мамлакатимизда инсон қадри улуғлангани сари вилоят аҳлининг ўз турмушидан розилиги ошмоқда.
Давлатимиз раҳбари Шавкат Мирзиёев ҳар сафар Хоразмга ташрифи давомида белгилаб берган топшириқлари асосида амалга оширилаётган ишлар қадимий ва навқирон Хоразмнинг янги қиёфасини шакллантирмоқда.
Хоразмга Ўзбекистон Республикаси Президенти Шавкат Мирзиёевнинг навбатдаги ташрифи шу йилнинг 1-2 май кунлари бўлиб ўтди.
Ушбу ташрифнинг асосий мақсади вилоятда амалга оширилаётган ижтимоий-иқтисодий лойиҳалар билан танишиш, янги ривожланиш истиқболларини белгилаш ва аҳоли фаровонлигини оширишга қаратилган саъй-ҳаракатларни қўллаб-қувватлашдан иборат эди. Президентнинг ташрифи давомида бир қатор муҳим ташаббуслар кўриб чиқилди, янги лойиҳаларни бошлашга доир кўрсатмалар берилди ва вилоятни янада ривожлантириш йўлида зарур чора-тадбирлар белгиланди. Ташрифда вилоятнинг иқтисодий ривожланиши, туризм салоҳияти, қишлоқ хўжалиги, саноатни модернизация қилиш масалалари эътибор марказида бўлди. Шунингдек, таълим соҳасига алоҳида эътибор қаратилди, чунки таълим — замонавий ривожланишнинг асоси ҳисобланади.
Президент ташрифининг дастлабки қисми Хоразмнинг авиақатнови соҳасига бағишланди. Маълумки, Урганч халқаро аэропорти янги лойиҳа доирасида модернизация қилинмоқда. Бу лойиҳа нафақат вилоятнинг иқтисодий ўсишига, балки туризм соҳасининг ривожланишига ҳам катта ҳисса қўшади. Янги лойиҳа аэропортнинг қувватини ошириш, йўловчиларга хизмат кўрсатиш сифатини яхшилаш ва хорижий инвестицияларни жалб этиш учун зарур бўлган барча инфратузилма шарт-шароитларини яратади. Президент бу лойиҳанинг аҳамиятини таъкидлаб, лойиҳани амалга оширишда халқаро тажриба ва юқори малакали мутахассисларнинг маслаҳатларига таяниш зарурлигини қайд этди.
Бундан ташқари, Урганч халқаро аэропорти яқинида жойлашган Ал-Хоразмий шаҳарчасининг қурилиши ҳам Президент ташрифида алоҳида ўринда турди. Ушбу шаҳарча 130 гектар майдонда қурилмоқда ва вилоятга келган меҳмонлар учун гўзал бир маскан бўлиб хизмат қилиши кутилмоқда. Шаҳарчанинг марказида ал-Хоразмий бобомизнинг ҳайкали ўрнатилиши режалаштирилган бўлиб, бу нафақат Хоразмнинг илм-фан ва маданиятга бўлган эътиборини акс эттиради, балки вилоятга ташриф буюрган туристлар учун мазмунли ва тарихий манзара яратади. Президент ушбу ҳайкални нафақат бунёдкорлик, балки маъно жиҳатидан ҳам янада такомиллаштириш зарурлигини таъкидлади ва шаҳарчада яшилликни кўпайтириш бўйича кўрсатмалар берди.
Президент Шавкат Мирзиёевнинг Хоразм вилоятига ташрифи давомида саноатни ривожлантиришга доир кўплаб янгиликлар кўриб чиқилди. Хонқа туманида янги мебелсозлик саноат зонасининг ташкил этилиши вилоятнинг саноат салоҳиятини оширишга хизмат қилади. Ушбу саноат зонаси Хоразм вилоятида янги иш ўринлари яратиш, маҳаллий ишлаб чиқаришни қўллаб-қувватлаш ва янги маҳсулот турларини ишлаб чиқариш имкониятларини яратиш мақсадида ташкил этилган. Президент ташриф давомида устахоналарда ишлаб чиқарилаётган маҳсулотлар билан танишди, маҳсулотлар сифатини ва дизайнини юқори баҳолади. Юртбошимиз бу соҳани янада ривожлантириш учун янги буюртмаларни шакллантириш, янги турдаги маҳсулотларни маҳаллийлаштириш зарурлигини таъкидлади.
Хоразм вилоятида қишлоқ хўжалиги ва фермерликни ривожлантиришга доир муҳим ташаббуслар ҳам амалга оширилмоқда. Президент Шавкат Мирзиёев Хонқа туманидаги “Собиржон Юсуф” оилавий фермер хўжалигида бўлиб, бу соҳадаги фаолиятни юқори баҳолади. Фермер Ойимжон Отажонова билан мулоқотда унинг меҳнатсеварлиги, инновацион ёндашуви ва ёш авлодга бўлган масъулиятини таъкидлади. Ойимжон Отажонова ўзининг меҳнати ва хизматлари учун “Ўзбекистонда хизмат кўрсатган қишлоқ хўжалиги ходими” унвони билан тақдирланди. Бу каби рағбатлантиришлар фермерликни ривожлантиришга, қишлоқ хўжалиги маҳсулотларини ишлаб чиқаришни оширишга ва маҳаллий ишлаб чиқарувчиларни қўллаб-қувватлашга хизмат қилади.
Президент Шавкат Мирзиёевнинг ташрифи давомида таълим соҳасига бўлган эътибор алоҳида таъкидланди. Хоразм вилоятида таълимни янада ривожлантириш, ёш авлодга замонавий билимлар бериш, илм-фан ва инновацияларни ривожлантириш бўйича бир қатор ташаббуслар кўриб чиқилди. Президент, айниқса, вилоятдаги мактаблар ва олий таълим муассасаларини замонавийлаштириш, ўқувчиларга юқори сифатли таълим беришнинг аҳамиятини таъкидлади. Шунингдек, таълим муассасаларида янги ўқув технологияларини жорий этиш, юқори малакали педагогларни тайёрлаш, илмий изланишларни рағбатлантириш ва ёшларни ижтимоий фаолиятга жалб қилиш зарурлигини қайд этди.
Ёшларнинг илм-фан ва технологияларга бўлган қизиқишларини қўллаб-қувватлаш ва уларни халқаро миқёсда юқори малакали мутахассислар сифатида тайёрлаш учун янги имкониятлар яратиш мақсадида Хоразмда 2025-2026 ўқув йилидан фаолият бошлайдиган Ал-Хоразмий университети ташкил этилади. У сунъий интеллект, аэрокосмик муҳандислик, математика ва информатика бўйича таълим беради. Дарслар ўзбек ва инглиз тилларида, кредит-модуль тизимида олиб борилади.
Университетда 3 та: математика ва информатика факультети, аэрокосмик технологиялар муҳандислиги факультети ҳамда сунъий интеллект факультети бўлади. Уларда иқтисодиёт, ахборот технологиялари, саноат, хавфсизлик, энергетика ва экология каби соҳалар учун мутахассислар тайёрланади. Дарслар ўзбек ва инглиз тилларида, кредит-модуль тизими асосида олиб борилади. Қабулни 2025-2026 ўқув йилидан бошлаш режалаштирилган. Жами талабалар сони 4−6 минг атрофида бўлиши кўзда тутилган. Давлат раҳбари университет ҳудуди нафақат таълим, балки Хоразмнинг тарихий-илмий ва туризм салоҳияти билан уйғун мажмуа бўлиши кераклигини таъкидлади.
Қайд этиш жоизки, Ал-Хоразмий шаҳарчаси ҳудудида Тошкентдаги Муҳаммад ал-Хоразмий мактабининг филиали ҳам ташкил этиладиган бўлди. Унга 4-синф битирувчилари танлаб олинади. Таълимнинг якунловчи 2 йили муҳандисликка бошланғич тайёргарликка қаратилади. Яъни, ихтисослаштирилган мактабнинг муҳандислик таълим дастурлари Ал-Хоразмий университети бакалавриат таълим дастурлари билан ўзаро интеграция қилинади. Муҳандислик таълим дастурларини лозим даражада ўзлаштирган битирувчиларга ўз ўқишини ушбу университетнинг тегишли бакалавриат таълим йўналишида 2-босқичдан давом эттириш имкони яратилади.
Давлатимиз раҳбарининг бу борадаги ташаббуслари таълим соҳасини ривожлантиришга катта ҳисса қўшади ва ёшларни замонавий билимлар билан таъминлаш, уларнинг келажаги учун мустаҳкам асос яратади.
Хоразм вилоятининг туризм салоҳияти ҳам Президент ташрифида алоҳида эътиборга олинди. Хива шаҳрида очилган “Арда Хива” халқаро туризм маркази вилоятнинг туризм инфратузилмасини янада ривожлантиришга хизмат қилмоқда. Бу мажмуа, тарихий Хива шаҳрининг қадимий ва замонавий архитектурасини уйғунлаштирган ноёб лойиҳа бўлиб, туризм соҳасида катта аҳамиятга эга. Президент Шавкат Мирзиёев мажмуа бўйлаб юриб, бунёдкорлик ишларини кўздан кечирди, ҳунармандчилик, бадиий ва амалий санъат кўргазмаларини томоша қилди. “Арда Хива” мажмуаси, Хива шаҳрининг ўзига хос тарихини ва маданиятини сақлаган ҳолда, вилоятни дунёга танитишга ёрдам беради.
Шунингдек, Президентимиз ёшлар билан мулоқотда бўлиб, уларнинг ўқишдаги муваффақиятлари, орзу-интилишлари ҳақида фикр алмашди. Юртбошимиз ёшларнинг илм-фан, санъат ва туризм соҳасида фаолият юритишларини рағбатлантирди ва келажакда улар учун янги имкониятларни яратиш зарурлигини таъкидлади.
Президент Шавкат Мирзиёевнинг Хоразм вилоятига ташрифи ҳудуднинг иқтисодий ва ижтимоий ривожланиши йўлидаги катта қадамни англатади. Янги лойиҳалар, инновацион ёндашувлар, меҳнатсеварлик ва ёш авлодга бўлган эътибор, Хоразмни дунёдаги энг гўзал ва обод ҳудудга айлантиришга хизмат қилади. Ушбу ташриф вилоятнинг ривожланишига янги туртки бўлиб, аҳоли фаровонлигини оширишга, илм-фан ва технологияларни ривожлантиришга хизмат қилмоқда. Таълимга эътибор бериш орқали эса, Хоразмнинг келажакдаги юксалиши учун мустаҳкам пойдевор яратилиб, ёш авлоднинг дунё саҳнасида муваффақиятли фаолият юритишларига замин яратади.
Бу ташриф, шубҳасиз, Ўзбекистоннинг барча вилоятларининг иқтисодий ва ижтимоий ривожланишига илҳом манбаи бўлади.
Сардор ХОДЖАНИЯЗОВ,
Абу Райҳон Беруний номидаги
Урганч давлат университети
ректори в.в.б.,
педагогика фанлари доктори, профессор.