Матбуот керак деймиз, аммо…
Бу ҳақда жуда кўп гапирилади. Матбуот керак деймиз. Матбуот ўлмайди деймиз. Аммо…
Гап шундаки, борган сари, кун ўтган сари газета ва журналларга муносабат ғариблашиб, сарғайган газеталардек янада сарғайиб бормоқда. Тўғри, бугун интернет замони, бир лаҳзада исталган маълумотни, янгиликни ундан олиш мумкин. Лекин нега, ҳа, нима учун ана шу интернет деганлари мисли кўрилмаган даражада ривож топган Япония, АҚШ, Англия, Франция, Хитой, Ҳиндистон сингари мамлакатларда босма нашрлар ҳар куни юз минглаб нусхаларда чоп этилмоқда? Нима у ерда яшаётган миллионлаб одамлар биздан кўра орқада қолиб кетдимикин?
Шубҳасиз, бугун юртимизда кўп ва хўп хайрли ишлар амалга оширилаётгани бор гап. Аммо икки-учта ҳукуматга қарашли ёки сайлов ва бошқа сиёсий тадбирлар боис партия нашрларига кўрсатилаётган ёрдам, кўмак туфайли саноқли нашрлар гуркирамаса-да, қаддини тиклаб турибди. Лекин мамлакатдаги бошқа нашрлар-чи, уларга нима бўлади, уларга ким кўмак беради?
Матбуот нашрлари жамиятнинг кўзгуси экан, улар мустақил ва ҳур экан, нега энди давлат кўмак бериши керак?, — дерсиз. Ҳақсиз. Аммо ОАВга муносабат жамиятда тенг ва адолатли бўлиши ҳам керак-да!
Ҳозир пойтахтимизда саноқли газета дўконлари қолди. Уларда ҳам ҳукумат ва Президент сиёсатини ёритадиган нашрларни топиб бўлмайди. Сотувга чиқмайди бу нашрлар. Вилоятларда, туманларда матбуот дўконларини чироқ ёқиб ахтариш керак.
Шундай экан, маънавият элчиси, жамият шифокори бўлган нашрлар фаолиятига жиддий эътибор қаратиш зарур ва бу бугуннинг оғриқли муаммосига айланиб улгурди. Хўш, матбуотни ким қутқаради? Ким уларга обуна бўлади? “Мажбурий обуна” деб ихтиёрий обунани ҳам йўқ қилдик”, —дея очиқ ва куюнчаклик билан айтган эди Президентимиз Шавкат Мирзиёев. Агарда матбуотда эълон қилинаётган долзарб чиқишларга эътибор кучайтирилса, соҳа жонли қўллаб-қувватланса бундан жамият, одамлар жуда катта манфаат кўради. Бунга шак-шубҳа йўқ.
Худди шундай бўлишига, албатта чора топилишига умид қиламиз шаксиз!
Эгамберди ХЎЖАМУРОДОВ