Дональд Трамп – АҚШнинг 47-президенти
Ҳа, шу йилнинг 20 январидан бошлаб Дональд Трамп АҚШнинг 47-президенти лавозимига киришди. Қасамёд қилиш учун у Американинг 16-раҳбари бўлган Авраам Линкольннинг Инжилидан фойдаланган.
“Американинг олтин асри айни шу дамдан бошланади, бугундан бошлаб биз гуллаб-яшнай бошлаймиз ва барча мамлакатлар бизга ҳасад қилади”, деган Трамп ўз инаугурация нутқида.
У анъанага кўра, президентлик вазифаларини виждонан бажаришга ва АҚШ конституциясини ҳимоя қилишга қасамёд қилди. Шунингдек, Жеймс Девид Венс ҳам АҚШ вице-президенти лавозимига киришди.
Инаугурация маросими Капитолий биносида бўлиб ўтди, унда ўрнини Трампга бўшатиб берган президент Жо Байден ва эндиликда собиқ вице-президент Камала Ҳаррис ҳам иштирок этди. Шунингдек, тадбирга мамлакатнинг аввалги президентлари Барак Обама (2009-2017), Билл Клинтон (1993-2001), кичик Жорж Буш (2001-2009), собиқ давлат котиби Хиллари Клинтон ташриф буюрди.
Инаугурация маросимидан сўнг президент Дональд Трамп Вашингтондаги “Cаpital Оne” стадионида ўз тарафдорлари олдида сўзга чиқиб, дастлабки тўққизта фармонни имзолаганини маълум қилди. Биринчи имзоланган фармонлар Жо Байден даврида қабул қилинган 78 та қарорни бекор қилиш, шунингдек, АҚШнинг Париж битимидан чиқишни ҳам ўз ичига олган. Унинг дастлабки қарорлари қаторида қуйидаги қарор ва вазифалар ўрин олган:
* 2021 йил январдаги Капитолийга ҳужумда айбланган 1,5 минг маҳкумни тўлиқ афв этиш тўғрисидаги ҳужжат. Уларнинг тез орада озод қилиниши кутилмоқда.
* Трамп Россия президенти Владимир Путин билан учрашиш ниятида. Президент Украинадаги можарони тезроқ тўхтатишга ҳаракат қилади. Россия президенти билан мулоқотдан кейингина Украина можаросининг тугаш муддатларини аниқлаш мумкин.
* Трампнинг таъкидлашича, Америка Украинага ёрдам бериш учун НАТОга қараганда 200 миллиард доллардан кўпроқ маблағ сарфлаган. У НАТОга аъзо давлатлардан қўшимча 5 фоиз тўловларни талаб қилиш ниятида.
* Трамп АҚШнинг Жаҳон Соғлиқни Сақлаш ташкилотидан чиқиш тўғрисида ҳужжатни ҳам имзолаган.
* Трамп Мексика кўрфазини Америка кўрфази деб қайта номлаш жараёнини бошлаш тўғрисидаги фармонни имзолаганини маълум қилди.
* Яна бир муҳим қарорлардан бири бу — АҚШда туғилганлик ҳуқуқи асосида фуқаролик олишни чекловчи фармондир. Эндиликда ушбу Фармон федерал агентликларга, одатда, АҚШ фуқароларига бериладиган муайян ҳужжатларни расмийлаштиришни тақиқлайди.
* Шунингдек, Президент иммиграция чораларини кучайтиришга олиб келадиган бир қатор фармонларни имзолаган. Хусусан, у АҚШнинг жанубий чегарасида жиддий чораларни эълон қилиб, АҚШнинг чегара девори қурилишини якунлаш учун Пентагон ва мамлакат Қуролли кучларидан қўшимча ресурсларни йўналтиришни назарда тутади.
* Дональд Трамп, АҚШ Президенти: «Бугунги кунга келиб Қўшма Штатларнинг расмий сиёсати фақат икки жинсни- эркак ва аёлни тан олишдир.»
* Бундан ташқари, Трамп АҚШ мудофаа салоҳиятини янада ошириш, хусусан, мамлакатни ҳаво ҳужумидан мустаҳкам ҳимоя қиладиган жаҳонда мутлақо тенгсиз тузилмани яратишга оид вазифани мақсад қилганини билдирди.
Вақт — олий ҳакам. Президент Трампнинг бу ниятлари нечоғлиқ амалга ошишини ҳам, албатта, вақт кўрсатади.
Интернет маълумотлари асосида
Ислом ЭГАМБЕРДИЕВ тайёрлади.