Ўзбек йўлга чиқди, йўл бергин, жаҳон!

Зулфия МЎМИНОВА

Муаллиф ҳақида:

Зулфия Мўминова  – 1959 йил Нарпай туманида туғилган.

ТошДУ (ҳозирги Ўзбекистон Миллий университети)нинг филология факультетини тамомлаган.

Журналистик фаолиятини “Саодат” журналидан бошлаб, кейинчалик “Спорт” газетаси, Республика радиоси, Ўзбекистон хотин-қизлар қўмитаси ҳамда бошқа давлат ташкилотларида турли масъул лавозимларда меҳнат қилган.

“Ватан ташлаб кетмайди”, “Бешикларни асрагин, дунё”, “Ёнаётган аёл”, “Азизим, бахтиёрман”, “Аёлга бахт беринг”, “Буюк уйғониш”, “Аёлга гул беринг”, “Ишқ фаслида бор эдим”, “Самога сочилган юлдузлар” (Пахтакор-79 футбол жамоаси хотирасига), “Истиқлол – олтин гулим”, “Юрагига Сурхондарё сиққан аёл”, “Болага китоб беринг” назмий ва насрий асарлари ҳамда болалар учун “Бўрини енгган қўзичоқ”, “Юмшоғой исмли типратиканча”, “Шляпа кийган эчки”, “Хўроз нега учолмайди?”, “Қорбобонинг болалиги” каби эртаклар ва шеърлар тўпламлари чоп этилган.

“Ўзбекистонда хизмат кўрсатган маданият ходими” унвони, “Дўстлик” ҳамда “Меҳнат шуҳрати” орденлари билан тақдирланган.

Ўзбекистон Ёзувчилар уюшмаси аъзоси.

 

ФУТБОЛ БЎЙИЧА ЎЗБЕКИСТОН ТЕРМА ЖАМОАСИГА

Темурнинг ёнида терма жамоа,

Енгилма ва завол кўрма, жамоа.

Мана, отга чиқдинг, жаҳонга чиқдинг,

Отингни ҳеч кимга берма, жамоа!

 

Темурнинг ёнида терма жамоа,

Ютқазиш нелигин билма, жамоа.

Қара, қанча шодмиз, нақадар шодмиз,

Шодликдан бебаҳра қилма, жамоа!

 

Темурнинг ёнида темир жамоа,

Ёнингга келолмас ҳеч бир жамоа.

Темирдек мустаҳкам, темирдек маҳкам,

Сизга тенг келолмас ҳеч бир жамоа.

 

Темурнинг ёнида темир жамоа,

Ёнингга келганни синдир, жамоа.

Дуо қилиб кутдик ва йиғлаб кутдик,

Кўз ёшларни артар кундир, жамоа!

 

Энг аввал Юртбошим тушди майдонга,

Коррупция деган балчиқ бўлди даф.

Футболда тозалик, софлик, шаффофлик —

Майдонни минадан тозалашдек гап.

 

Энг аввал Юртбошим тушди майдонга,

Суяниб жасорат деган тиргакка.

Ишон, минг зарбани кўтармоқ юки

Оғир, жуда оғир битта юракка.

 

Бир дона олтинни топмоқлик учун

Минг тонна тупроқни элаш осонмас.

Тирноқлаб, мисқоллаб йиққан олтинни

Тозалаб, юксакка йўллаш осонмас.

 

Мана, юксакларда терма жамоа,

Майдонни ҳеч кимга берма, жамоа.

Ўттиз саккиз миллион халқим бахтига

Енгилма ва завол кўрма, жамоа!

 

Рақиблар майдонни бергиси келмас,

Бир зарб бер, шаштини пастлат, жамоа,

Жаҳон унутганга ўхшар, жаҳонгир

Темурлар кимлигин эслат, жамоа.

Темурнинг ёнида терма жамоа,

Майдонни ҳеч кимга берма, жамоа!

 

ФУТБОЛ ЎЙНАЁТИР ЎЗБЕК БОЛАСИ

(Ўзбекистон Республикаси Президентининг “Футбол бўйича ўн етти ёшгача бўлган ўсмирлар ўртасидаги Осиё кубоги ўйинлари ғолиблари ва иштирокчиларини мукофотлаш тўғрисида”ги Фармони эълон қилинди.)

Боболари орзу қилолмаганлар,

Оталари орзу қилолмаганлар,

Даласидан бери келолмаганлар,

Футбол ўйнаётир ўзбек боласи.

 

Шудгорнинг бошида бола туққанлар,

Уйин томигача пахта экканлар,

Етмаган жойига жонин тикканлар,

Футбол ўйнаётир ўзбек боласи.

 

Ўзбек асллари, ўзни билганлар,

Музни ёриб чиққан, тошни тилганлар,

Аждарнинг оғзидан омон келганлар,

Футбол ўйнаётир ўзбек боласи.

 

Етмиш йил ер бўлиб ётганлар айтсин,

Бутифос заҳрини тотганлар айтсин,

Пахта деб кўмирдек қотганлар айтсин,

Футбол ўйнаётир ўзбек боласи.

 

Рақибни гангитиб, ўйлатиб қўйиб,

Ўн бирга тўққизни ўйнатиб қўйиб,

Қора қошларини ўйнатиб қўйиб,

Футбол ўйнаётир ўзбек боласи.

 

Йиқилса ҳам, дарҳол кулиб туради,

Булар бунча қувноқ — кулиб юради,

Чемпион бўлишин билиб туради,

Футбол ўйнаётир ўзбек боласи.

 

Энди баҳор, ёз, қиш, кузгача футбол,

Бу мўъжиза футбол, ўзгача футбол,

Дунёни лол этди ўзбекча футбол,

Футбол ўйнаётир ўзбек боласи.

 

Юртбошим табриклаб, олқишлаб турди,

Совғага энг учқур “тулпор”лар берди,

Юрт йўлин ёритди, ўзбек кун кўрди,

Футбол ўйнаётир ўзбек боласи.

 

Яшил майдонларда бахтиёрларим,

Янги ўзбекларим, бахти борларим,

Эй аҳди ёрларим, шахти ёрларим,

Футбол ўйнаётир ўзбек боласи.

 

Темир тилсимларин ечди Осиё,

Чемпионга қучоқ очди Осиё,

Бошидан тиллолар сочди Осиё,

Футбол ўйнаётир ўзбек боласи.

 

Ўзбек қўл узатди, қўл бергин, жаҳон,

Олтин кубок томон йўл бергин, жаҳон,

Ўзбек йўлга чиқди, йўл бергин, жаҳон,

Футбол ўйнаётир ўзбек боласи.

 

ПЕЛЕНИНГ СИНГЛИСИ

(Болаликни эслаб)

 

Ака, ҳовлимизнинг шундай ёнида

Қирлар бўлар эди, ям-яшил қирлар.

Кишнаб ўтар эди, отлар-уюрлар,

Маъраб ўтар эди, қўйлар, сигирлар.

 

Сайҳонликда, қирнинг текис жойида

Майдон бўлар эди, футбол майдони.

Сен учун бу майдон, бу яшил майдон

Дунёда ягона, энг катта эди.

Қирнинг баланд жойи, харсанг устида,

Томошабин зоти — мен битта эдим.

Битта кам бўларди сен ўйнар тараф,

Иккита ўйинчи саналардинг сен.

 

Қайсар томошабин — менинг ўнгимда

Ҳар кун ҳисоб берар, синалардинг сен.

Сени “Пеле” дея аташар эди,

Пеленинг синглиси аталардим мен.

 

Ҳакам бўлган эмас ҳеч бир ўйинда,

Келишиб ўйнарди иккала томон.

Гол урсанг, менга бир қараб қўярдинг,

Қўл силтаб қўярдим мен ҳам сен томон.

 

Мабодо енгилсанг, жим қайтар эдик,

Мен-чи, яширардим кўзим ёшини.

Бошгинангни эгиб турар эдинг сен,

Бош эгиб ичардинг кечки ошингни.

 

Сумкалар турарди майдон четида

“Икки”лари билан, “беш”лари билан,

У ерда ҳеч кимнинг иши йўқ эди,

Дунёнинг савдойи ишлари билан.

 

Энди тушларимга кирар у майдон,

Ўша яшил майдон, озода майдон.

Беғубор қийқириқ бағрини тутган

Энг покиза майдон, энг тоза майдон.

 

Ўйинлар тугади, болалик кетди,

Ўшандай севинчга тўлолмадим мен,

Ака, сендан Пеле чиқмади, ака,

Пеленинг синглиси бўлолмадим мен.

 

Қирлар текисланиб пахта экилди,

Гол урмоқ ўрнига пахта тердинг сен.

Қанча севинчингни, қанча голингни

Ҳисобчига ўлчаб-ўлчаб бердинг сен.

 

Ака, бу ўйинда ютқаздинг, ака,

“Пахта” деб аталган рақибинг ютди.

“Пеле” деб ёзилган футбол тўпинг ҳам

Пахтазор ичида йўқолиб кетди.

 

Ҳамон гап очилса футбол ҳақида,

Ўшандай чарақлаб кетар кўзларинг.

Мен-чи, ерга боқиб тилак қиламан,

Тилагимни осмон-фалак қиламан,

Ўғилларинг Пеле бўлсинлар, ака,

Пеленинг синглиси бўлсин қизларинг.

  

ЧИНОРИМ

(Футбол бўйича Ўзбекистон терма жамоаси дарвозабони Ўткир Юсуповга)

“Оқ бўрилар”да сен бир бўрисан,

Сергак қўриқлайсан дарвозамизни.

Бирга-бир чиққанда зўрдан зўрисан,

Олам эшитмоқда овозамизни.

 

Сенинг совутинг бор, сен қоплангансан,

Сенинг сабринг метин, бардошинг олтин.

Рақиблар билмайди, сен тоблангансан,

Оёқларинг темир ва бошинг олтин!

 

Футбол — жанг майдони, ёлғиз бўрисан,

Ўн битта рақибнинг сенда ўчи бор.

Улар билмайдики, сен дуо олган,

Сенда ўттиз саккиз миллион кучи бор.

 

Дерлар: дарвозабон — ярим жамоа,

Бўри бўл, йўлбарс бўл, бургут бўл учиб.

Тўпнинг йўналишин шамолдан сўра,

Ер билан гаплашгин тупроқни қучиб.

 

Бу кунни онангдек кутдик, Ўткиржон,

Қанча Ўткирларни бой берди ўзбек.

Ўзиникин туртиб, беш бегонага

Жамоа тўридан жой берди ўзбек.

 

Кўзига тик қараб Ўткирларининг,

Ўтмас деб, муттасил ерга урдилар.

Тинимсиз сариғу қизил кўрсатиб,

Ўйинда чиқарди, четга сурдилар.

 

У кун ортда қолди, янги тонг отди,

Шу тонгда юксалдинг, бўйи чинорим.

Ор учун от миниб майдонга тушмоқ,

Аслида, наслида, қонида борим.

 

Юртбошим ишонч-ла қўллаб турганда

Ўзбек футболига ҳаром йўлолмас.

Сен ўткир қиличсан, ҳеч бир қўриқчи

Сенга тенг келолмас, сендек бўлолмас.

 

Дарвозалар кўпдир, дарвозабон ҳам,

Энг баландда ўзинг қоя, қалқонсан.

Ўзбек футболида биринчи бўлиб,

Жаҳонга йўл олган дарвозабонсан!