Бекобод. Меҳр ва металл таърифида

Сирожиддин САЙЙИД,

Ўзбекистон халқ шоири,

Олий Мажлис Сенати аъзоси

Элдошларим иродаси темирдан, ҳам метиндан,

Биз бирлашсак – буюк халқмиз, биргалашсак, биз – Ватан!

Бекободим, иродаси темир-бетон шаҳримсан,

Не-не ошиқ шоирларга орзу-армон шаҳримсан.

Ортга қайтмас шаштларинг зўр, карвонларинг бор бўлсин,

Темир-метин иродали сарбонларинг бор бўлсин!

Тинч бўлсин деб дунё тун-кун дуо айлар оналар,

Мамлакатга металл керак милён-милён тонналар.

Она шаҳрим, шамолларинг бағринг аро кезган дам,

Шеърим билан шамол бўлиб эсгим келар менинг ҳам.

Янги-янги уй-жойларга маҳалла-кўй тўлгуси,

Бу темирлар кўркам, маҳкам иморатлар бўлгуси.

Темир янглиғ, метин янглиғ яхлит бир жону танмиз,

Элдошларим, бир бўлсак биз – бир халқу бир Ватанмиз!

Шоир, сен ҳам бу ҳаётни оташ шеърларга тўлдир,

Металлургиянг шулдир! Металлургиянг шулдир!

Эгатларда қолиб кетган йилларимнинг қарзидай,

Маъданим деб, метиним деб фахрлансам арзигай.

Бизлар фарзанд ўстиргаймиз – муносиб, мутаносиб,

Ўғил – қизга муносибдир. Қиз – ўғлонга муносиб.

Ўғил-қизда келажакнинг жамолини кўргаймиз,

Бизлар Ватан ўстиргаймиз, бизлар Ватан қургаймиз.

Ўйлайманки, бир сўзимни оғир олмас шоирлар:

Замон юкин енгиллатинг, қилманг уни оғирлар.

Кўз олдимда Вақт эмас, гуррос солиб ўтар Сўз,

Давр сендан Сўз кутмоқда, замон сендан кутар Сўз.

Бир юз ўн минг эл-улуснинг кўзларига тик қараб,

Шеърлар айтсанг, юзинг ёруғ – бу не толе, не шараф!

Сизникидир бу имконлар – ҳар бир ўғил-қизники,

Бу давронлар Сизникидир! Бу замонлар – Сизники!

Рақам урсам – сафларингиз ўттиз мингдан зиёда,

Шундай ўғил-қизларим бор доно, зукко, озода.

Темирданмиз, пўлатданмиз, метиндан бир жону тан,

Биз бирлашсак – буюк халқмиз, биргалашсак – биз Ватан!

Эл номига келтирмоқ-чун рағбатлару раҳматлар,

Ҳали қанча меҳнат керак, ҳали қанча заҳматлар.

Қалбинг жўшар – худди металл қайнаётган қўрадир,

Ватан сендан сўз сўрайдир, эл-улус сўз сўрайдир.

Қурол-яроғ ўйнаб турган қаттол дунё бир тараф,

Элни китобга қайтарган инсонларга шон-шараф!

Темирқанот жужуқларинг бургут бўлсин, сор бўлсин,

Метин иродали марди майдонларинг бор бўлсин!

Янги шаҳар, Сирдарёдан нариёғи Хўжанддир,

Темурмалик полвон келса – бу тарихий ҳужжатдир.

Давру замон солномасин тарих ўзи баҳолар,

Бунда не-не чемпионлар ўсар, не-не даҳолар.

Темир янглиғ, метин янглиғ бизлар бир жону танмиз,

Элдошларим, биз бирлашсак – бир халқу бир Ватанмиз.

Темирданмиз, пўлатданмиз, метинмиз – бир жон ва тан.

Биз бирлашсак – буюк халқмиз, биргалашсак, биз – Ватан!..

“Халқ сўзи” газетасининг 2026 йил 14 июль №142-сонидан олинди.