Bekobod. Mehr va metall ta'rifida
Open book on green grass in a field with daisys background concept for reading, relaxing and recreation
Sirojiddin SAYYID,
O'zbekiston xalq shoiri,
Oliy Majlis Senati a'zosi
Eldoshlarim irodasi temirdan, ham metindan,
Biz birlashsak – buyuk xalqmiz, birgalashsak, biz – Vatan!
Bekobodim, irodasi temir-beton shahrimsan,
Ne-ne oshiq shoirlarga orzu-armon shahrimsan.
Ortga qaytmas shashtlaring zo'r, karvonlaring bor bo'lsin,
Temir-metin irodali sarbonlaring bor bo'lsin!
Tinch bo'lsin deb dunyo tun-kun duo aylar onalar,
Mamlakatga metall kerak milyon-milyon tonnalar.
Ona shahrim, shamollaring bag'ring aro kezgan dam,
She'rim bilan shamol bo'lib esgim kelar mening ham.
Yangi-yangi uy-joylarga mahalla-ko'y to'lgusi,
Bu temirlar ko'rkam, mahkam imoratlar bo'lgusi.
Temir yanglig', metin yanglig' yaxlit bir jonu tanmiz,
Eldoshlarim, bir bo'lsak biz – bir xalqu bir Vatanmiz!
Shoir, sen ham bu hayotni otash she'rlarga to'ldir,
Metallurgiyang shuldir! Metallurgiyang shuldir!
Egatlarda qolib ketgan yillarimning qarziday,
Ma'danim deb, metinim deb faxrlansam arzigay.
Bizlar farzand o'stirgaymiz – munosib, mutanosib,
O'g'il – qizga munosibdir. Qiz – o'g'longa munosib.
O'g'il-qizda kelajakning jamolini ko'rgaymiz,
Bizlar Vatan o'stirgaymiz, bizlar Vatan qurgaymiz.
O'ylaymanki, bir so'zimni og'ir olmas shoirlar:
Zamon yukin yengillating, qilmang uni og'irlar.
Ko'z oldimda Vaqt emas, gurros solib o'tar So'z,
Davr sendan So'z kutmoqda, zamon sendan kutar So'z.
Bir yuz o'n ming el-ulusning ko'zlariga tik qarab,
She'rlar aytsang, yuzing yorug' – bu ne tole, ne sharaf!
Siznikidir bu imkonlar – har bir o'g'il-qizniki,
Bu davronlar Siznikidir! Bu zamonlar – Sizniki!
Raqam ursam – saflaringiz o'ttiz mingdan ziyoda,
Shunday o'g'il-qizlarim bor dono, zukko, ozoda.
Temirdanmiz, po'latdanmiz, metindan bir jonu tan,
Biz birlashsak – buyuk xalqmiz, birgalashsak – biz Vatan!
El nomiga keltirmoq-chun rag'batlaru rahmatlar,
Hali qancha mehnat kerak, hali qancha zahmatlar.
Qalbing jo'shar – xuddi metall qaynayotgan qo'radir,
Vatan sendan so'z so'raydir, el-ulus so'z so'raydir.
Qurol-yarog' o'ynab turgan qattol dunyo bir taraf,
Elni kitobga qaytargan insonlarga shon-sharaf!
Temirqanot jujuqlaring burgut bo'lsin, sor bo'lsin,
Metin irodali mardi maydonlaring bor bo'lsin!
Yangi shahar, Sirdaryodan nariyog'i Xo'janddir,
Temurmalik polvon kelsa – bu tarixiy hujjatdir.
Davru zamon solnomasin tarix o'zi baholar,
Bunda ne-ne chempionlar o'sar, ne-ne daholar.
Temir yanglig', metin yanglig' bizlar bir jonu tanmiz,
Eldoshlarim, biz birlashsak – bir xalqu bir Vatanmiz.
Temirdanmiz, po'latdanmiz, metinmiz – bir jon va tan.
Biz birlashsak – buyuk xalqmiz, birgalashsak, biz – Vatan!..
“Xalq so'zi” gazetasining 2026 yil 14 iyul №142-sonidan olindi.