Hayotim mazmuni

Dunyoda kasblar ko'p. Ahamiyatlisi, har birining o'ziga yarasha zavqi-yu mehnat mashaqqatlari bisyor. Albatta, bu haqda har kim ham hamma vaqt gapiravermaydi. Binobarin, O'zbekiston Qahramoni, xalq shoiri Erkin Vohidov ta'kidlaganidek, ”O'zing to'g'ringda gapirishdek qiyin narsa yo'q”.

Bugun esa 27 iyun — Matbuot va ­ommaviy axborot vositalari xodimlari kuni, ya'ni hamisha har yerda hozir, har narsadan xabardor, tezkor soha vakillarining kasb bayrami. Demak, bu gal istaymizmi-yo'qmi, o'z sohamiz va o'zimiz haqimizda gapirishga to'g'ri keladi.

Jurnalistika — hamisha xalq bilan hamnafas, serqirraligi bilan ajralib turadi. U kirib bormagan soha, yoritmaydigan mavzu, yo'nalishning o'zi yo'q. Tibbiyot, ta'lim, qurilish, qishloq xo'jaligi deysizmi, barcha-barchasini qamrab oladi. Albatta, buning uchun xoh bosma nashr, xoh radio, televidenie, axborot xizmati yoki internet jurnalistikasi bo'lsin, har biri haqidagi zarur ma'lumotlarni bilish g'oyatda muhim. Chunki jurnalistikada, avvalo, iqtidor va kerakli ma'lumotlarga ega bo'lmasdan yaxshi material tayyorlash mushkul. Shuningdek, so'z qudrati orqali odamlar qalbi zabt etiladi, hatto katta muammolar ham yechim topadi.

Jurnalistika — mashaqqatli va zavqli hayot yo'li. Bu keng jamoatchilikka matbuot orqali taqdim qilinadigan materiallarni tayyorlash jarayonlarida yorqin aks etadi. Jurnalist hamisha xalq bilan birga. U hamisha davlat va xalq uchun xolis xizmatda. Haqiqatdan so'zlovchi ko'zgu. Aslida, jurnalistda vaqt chegaralanmagan. Asosiy ish jarayonlari uzoq-yaqin manzillar-u turli qatlamlardagi insonlar bilan muloqotda kechadi. Omma e'tiboriga havola etadigan yangi mahsuloti uchun issiq-sovuq demay masalliq, ya'ni ma'lumot yig'adi, kezi kelsa, o'zini unutib qo'yadi. Hatto tushlik uchun vaqtini qizg'anadi, ko'pincha uydagi dam olish soatlarida ham maqola, matn yozish bilan band bo'ladi. Yozganlari, tayyorlaganlari muharrirdan o'tib, ommaga yetib, yaxshi fikr eshitmaguncha xotirjam bo'la olmaydi. Ehhe, butun faoliyati davomida bu hol necha marotaba takrorlanmaydi deysiz! Boshdan o'tadigan shuncha kuchli hayajon, ruhiy zo'riqishlarni-ku aytmasa ham bo'ladi. Ammo ertalab jismi-joni toliqib, ko'zlari uyqusizlikdan qizarsa-da, o'zini bardam tutib, yana ishga oshiqadi. Charchoqni unutib, yozganlari muharrir tahriridan o'tish-o'tmasligi, muxlislarga manzur bo'lish-bo'lmasligi haqida qayg'uradi. Materiali bosma matbuot yoki radio-televidenieda e'lon qilinsa va bu haqda kimdir iliq munosabat bildirsagina o'zini yengil his etadi. Charchoqlarni bir zumda unutib, go'yo dunyodagi eng baxtli insonlardan biriga aylanadi. Ba'zan esa buning aksi ham bo'lishi mumkin. Ya'ni kutilmaganda mashaqqatli mehnatlar samarasi hisoblangan jurnalistik mahsulot haqida kimdandir salbiy fikrlar eshitishi mumkin. Biroq tanqiddan to'g'ri xulosa chiqarish tajribani yanada oshiradi. Aslida, bularning barchasi jurnalistning bir kuni, bitta materiali e'lon qilinishigacha bo'lgan jarayonning qisqagina ko'rinishi, xolos.

Jurnalistika — ayrim yoshlar faqat qiziqarliligi uchun havas qiladigan yoki ba'zi birovlar oson deb o'ylagan shunchaki soha emas. Aksincha, avvalo, iqtidor va fidoyilik talab etadigan eng mashaqqatli, eng mas'uliyatli kasbdir. Matbuot — ijod maydoni, jurnalist — ijodkor va izlanuvchan shaxs. Undan hamisha yangilik kutiladi. U tahlil qiladi, tadqiq etadi, sharhlaydi, fikrlashga undaydi, dunyoqarashlarni shakllantiradi, yo'naltiradi, zavq-shavq bag'ishlaydi. Bu esa chinakam baxt. Men bugun qariyb 35 yillik faoliyatim davomida bularning barini bir emas, bir necha yuz, balki, ming marotaba his ettirgan jurnalistikadan cheksiz minnatdorman. Matbuot, radio va televidenieda ishlab, yaxshi ustozlar ko'rdim, charxlandim, chiniqdim, toblandim. Jurnalistika hayotimda uchragan og'ir sinovlarni yengishimga ham katta yordam berdi. Quvonganim, jurnalistik materiallarim meni ko'pchilikka o'z nomim bilan tanitdi, ozmi-ko'pmi, tajribalarim ustoz degan yuksak sharafga muyassar etdi. Oila va jamiyatda o'rnimni topdim. Bularning bariga shukr va barchasi uchun tashakkur, minnatdorman. Jurnalistika — fidoyilar maydoni. Bu “COVID-19” pandemiyasi davrida yana bir karra o'z isbotini ko'rsatdi. Chunki turli soha vakillari qatori ko'plab matbuotchilar ham o'z xizmat vazifalarini sidqidildan ado etib, eng og'ir nuqtalardagi jarayonlarni, vaziyatni batafsil yoritishda faollik namunalarini ko'rsatishdi. Xalqqa madad bo'lishdi, uning birdamligini, davlat siyosati va g'amxo'rligini yorqin ifoda etishdi. Xavfli kasallikka qarshi kurashishda va uni yengishda munosib hissa qo'shishdi.

Ne baxtki, kasbim jurnalist va albatta, bundan hamisha mamnunman. Toki hayotdaman, bu kasbga bo'lgan mehrim va sadoqatim meni aslo tark etmaydi. Zero, jurnalistika allaqachon hayotimning bir bo'lagiga aylangan taqdirim. Shu bois kasbimdan faxrlanaman. Kasbim — iftixorim! Fursatdan foydalanib, barcha ustozlar va hamkasblarimizni kasb bayramimiz bilan tabriklayman. Sharafli va mashaqqatli faoliyatlarida kuch-quvvat, ijodiy parvozlar tilayman.

Shahzoda AKBAROVA,

jurnalist.