Янгиланаётган Боботоғ
Хабар сарлавҳасини ўқишингиз билан миллион ёшдан ортиқ тоғ ҳам янгиланарканми, деб ўйлашингиз тайин. Бугун Учинчи Ренессанс насимини нафақат мамлакатимиз пойтахти, вилоятлар марказларида, балки энг чекка ҳудудларда ҳам кўришингиз мумкин. Айтайлик, Узун туманининг Боботоғ массиви вилоят марказидан 265 километр узоқликда жойлашган. Бу ердаги туб аҳолининг маданий турмуш даражаси тўрт- беш йил илгари анчайин оғир эди. Бу тоғли массивда 16 мингдан ортиқ аҳоли истиқомат қилишини айтсак, масала янада ойдинлашади.
Ҳар бир янгилик, ўзгаришнинг ўз вақти-соати бўларкан. Боботоғ қишлоғидаги шароит обдон ўрганиб чиқилиб, жорий йилнинг 17 февралида Президентимизнинг “2021-2023 йилларда Сурхондарё вилояти Узун тумани Боботоғ ҳудудини ижтимоий- иқтисодий ривожлантириш чора-тадбирлари тўғрисида”ги қарори қабул қилинди. Хўш, ўтган қисқа вақт оралиғида қарор ижроси бўйича қандай ўзгаришлар бўлди? “Боботоғ” ва “Янги ҳаёт” маҳаллаларида барча қулайликларга эга, замонавий жиҳозланган 120 ўринли 2 та янги мактабгача таълим муассасаси қурилиб фойдаланишга топширилди. Келгуси йилда эса “Оқмасчит” ҳамда “Толтўғай” маҳаллаларида яна 2 та ҳар бири 150 ўринли бўлган болалар боғчаси қурилиб, жажжи фарзандларимизни ўз бағрига олади.
Ҳудудда 9 та умумтаълим мактаби бўлиб, шундан тўрттасида 210 ўринли, 36-мактаб болалари учун шаҳардагидан қолишмайдиган уч қаватли 320 ўринли қўшимча ўқув биноси ва замонавий спорт зали ўқувчилар ихтиёрига топширилган. Шунингдек, 46-мактаб жамоаси ҳам янгидан бунёд этилган қўшимча ўқув биноси ва спорт зали учун Юртбошимиздан беҳад миннатдор. Дарвоқе, Боботоғ аҳолисининг оғирини енгил қилиш мақсадида суюлтирилган газ етказиб бериш шохобчаси қурилганлиги ҳам айни муддао бўлди.
Массивда яшаб хизмат қилаётган чегара қўшинлари ҳарбийлари оилалари учун 72 хонадонга мўлжалланган 3 та кўп қаватли уйнинг қурилиш ишлари ҳам жадал суръатларда олиб борилмоқда. Бу ердаги бунёдкорлик, ободонлаштириш ишларини ўз кўзлари билан кўриб, яқиндан танишган оммавий ахборот воситалари ходимлари ва жамоатчилик вакилларига келгусидаги режалар хусусида ҳам батафсил маълумотлар берилди. Бундай кенг кўламдаги вазифани ўн ойда бажариш мутасадди ходимлар, мутахассислар ва қурувчилардан катта матонат ва шижоат талаб қилишини айтмасак ҳам бўлади. Бир сўз билан айтганда, қадим Боботоғ қишлоғи мутлақо янгича кўриниш ва шукуҳли тароват касб этмоқда.
Сафар ОМОН,
“Hurriyat” мухбири