Қоровултепанинг мўъжаз музейи
Бағдод туманидаги Қоровултепа қишлоғи туман марказидан ўн уч чақирим олисда жойлашган бўлиб, бу ерда 6 минг нафардан ортиқ аҳоли истиқомат қилади.
Файзиёб кўчалар, аҳоли хонадонларида бошланган бунёдкорлик ва ободончилик ишларига ҳавасингиз келади. Йўллар равон, тунда ҳам кундузгидек чароғон. Замонавий хизмат кўрсатиш ҳамда ишлаб чиқариш шохобчалари қишлоқда саноат тармоқлари ривожланиб, аҳоли фаровонлиги ортиб бораётганидан дарак бериб турибди. Ҳар куни бир янгилик, эзгу ташаббуслар қулоч ёзмоқда.
Қоровултепанинг бошқа қишлоқлардан яна бир фарқли жиҳати бор. Меҳнат фахрийси Ғанижон Абдуллаевнинг саъй-ҳаракати билан бу ерда мўъжаз музей ташкил этилган. Музейдан ўрин олган осори-атиқаларнинг аксарияти ана шу қишлоқ одамларининг ўтмишдаги ҳаёт тарзидан сўзлайди. Бу ерда Катта Фарғона канали қурилишида ишлатилган кетмон, аёллар либослари, уй-рўзғор буюмлари, меҳнат ва ҳунармандчилик қуроллари жамланган. Қишлоқ музейидаги ҳар бир экспонат ва суратнинг эса ўзига хос тарихи бор. Буларни кўрган ёшлар ота-боболарининг оғир ўтмишини бугунги фаровон турмуш ҳамда яратилган қулайликлар билан қиёслаши, зарур хулосалар чиқаришида бу маскан ўзига хос мактаб, тарбия ўчоғи бўлиб хизмат қилади.
Олис қишлоқ одамлари билан суҳбатлашиб шуни англадикки, бир неча асрлик тарихга эга бу қадимий манзилгоҳ кишиларида ташаббускорлик, меҳнатсеварлик, ерни ва элни севиш, эл корига камарбаста бўлиш каби эзгу фазилатларни мужассам этган. Энг муҳими, чекка қишлоқ кун сайин шаҳар тусини олмоқда; одамлар қалбида ҳаётдан розилик, замон билан ҳамнафас одимлаш, фаровонлик ва ободликка ҳисса қўшиш туйғулари жўш урмоқда.
Шерзод ҚОРАБОЕВ.