Сўнгги қўнғироқ (Битирувчилар тилидан)

Рустам МУСУРМОН,

Қорақалпоғистон халқ шоири

Устозлар меҳридан баҳраманд бўлиб,

Ўқидик, мактабда тугади сабоқ.

Янграйсан хайрлашув вақтин билдириб,

Сўнгги қўнғироқ!

Дарснинг бошланиши, дарснинг якуни

Вақтида неча бор куй чалдинг янгроқ.

Наҳот, етиб келди айрилиқ куни,

Сўнгги қўнғироқ!

Нақадар қадрдон бизга овозинг,

Нақадар ўрганиб қолгандир қулоқ.

Мактаб мусиқаси, тенги йўқ созинг,

Сўнгги қўнғироқ!

Бахт йўлин излашга чорлайди ҳаёт,

Самода юлдузсан, уммонда маёқ.

Орзу осмонида толмагай қанот,

Сўнгги қўнғироқ!

Энди сен ҳаётнинг имтиҳонида

Устоз саволидек берасан сўроқ.

Янграб тур умрнинг ҳар бир онида,

Сўнгги қўнғироқ!

Она мактаб, сенинг ошиёнингдан

Қушлар каби учиб кетамиз йироқ.

Сайрайсан қақнусдек кечиб жонингдан,

Сўнгги қўнғироқ!

25. 05. 2021

Янгиликларни дўстларингизга улашинг