Ўзимнинг овозимга

                                  Тилак ЖЎРА

 

Палаклар остига беркиниб,

Офтобни, ойни кўрмай,

Кўзларни яшнатиб,

Лабларни сўрмай

Заҳил бўлган қовундай

Кўп ҳам беркинма менинг бағримга:

Осмондай ёрил сен!

Бу борлиқ садога қорилсин,

Менинг-да умидим ёрилсин,

Кўп ҳам беркинма менинг бағримга!

Бу ёруғ дунёда

Аламлар беркинар,

Армонлар беркинар,

Дармонлар беркинар,

Сен Ватансан барига,

Ахир, Ватан қандай беркинар?!

Кўп ҳам беркинма менинг бағримга!

Нафасим бўл, йўлимда бўлгин,

Рўмолчадай ғижимлай сени.

Фақат менинг қўлимда бўлгин!

Майли, сени кўтариб юрай;

Имон бўлгин, бўғзимда бўлгин!

Нафрат бўлгин, кўзимда бўлгин,

Фақат менинг ўзимда бўлгин,

Кўп беркинма менинг бағримга!

 

1982 йил

Янгиликларни дўстларингизга улашинг

Fikr bildirish

Email manzilingiz chop etilmaydi. Majburiy bandlar * bilan belgilangan

twenty − sixteen =