Қатъий карантин чекловларига қайтиш режалаштирилмаяпти
Сўнгги кунларда ижтимоий тармоқларда турли миш-мишлар авж олди. Айримлар “яна қатъий карантин чекловлари жорий этилар экан” деган ваҳималарни тарқата бошлади. Бу масалага кеча АОКАда ўтказилган матбуот анжуманида Санитария-эпидемиологик осойишталик ва жамоат саломатлиги хизмати бошлиғининг биринчи ўринбосари Холмамат Норбоев ойдинлик киритди.
– Чекловлар киритилишининг олдини олиш учун ҳам эмланишимиз керак, — деди Х.Норбоев.
– Бир нарсани яхши тушуниш керак, вакцина “Omicron” дан тўлиқ ҳимоя қилмайди. Лекин эмланган одамда касаллик енгилроқ ўтади. Биз уни юқтирмаслик учун жамоатчилик йиғилган жойларда бўлишни имкон қадар камайтиришимиз ва гигиенага эътиборли бўлишимиз керак, — деди Соғлиқни сақлаш вазири ўринбосари Э.Боситхонова.
Олий ва ўрта махсус таълим вазирлиги бош бошқарма бошлиғи Абдували Холиқовнинг таъкидлашича, 24 январдан кейин ОТМларда таълим жараёни онлайн форматга ўтказилмайди. Якуний назорат имтиҳонлари ўз вақтида бўлиб ўтади.
Ўз мухбиримиз