Qat'iy karantin cheklovlariga qaytish rejalashtirilmayapti
So'nggi kunlarda ijtimoiy tarmoqlarda turli mish-mishlar avj oldi. Ayrimlar “yana qat'iy karantin cheklovlari joriy etilar ekan” degan vahimalarni tarqata boshladi. Bu masalaga kecha AOKAda o'tkazilgan matbuot anjumanida Sanitariya-epidemiologik osoyishtalik va jamoat salomatligi xizmati boshlig'ining birinchi o'rinbosari Xolmamat Norboyev oydinlik kiritdi.
– Cheklovlar kiritilishining oldini olish uchun ham emlanishimiz kerak, — dedi X.Norboyev.
– Bir narsani yaxshi tushunish kerak, vaksina “Omicron” dan to'liq himoya qilmaydi. Lekin emlangan odamda kasallik yengilroq o'tadi. Biz uni yuqtirmaslik uchun jamoatchilik yig'ilgan joylarda bo'lishni imkon qadar kamaytirishimiz va gigienaga e'tiborli bo'lishimiz kerak, — dedi Sog'liqni saqlash vaziri o'rinbosari E.Bositxonova.
Oliy va o'rta maxsus ta'lim vazirligi bosh boshqarma boshlig'i Abduvali Xoliqovning ta'kidlashicha, 24 yanvardan keyin OTMlarda ta'lim jarayoni onlayn formatga o'tkazilmaydi. Yakuniy nazorat imtihonlari o'z vaqtida bo'lib o'tadi.
O'z muxbirimiz