Sabrning tagi…
Sabrning tagi oltin, deydilar. Lekin sabrning ham muddati bo'lishi kerak-da. Agar nihoyasi bo'lmasa, sabr va toqatdan nima foyda?
Ma'lumki, Surxon vohasining hamma qishloq va mahallalariga tabiiy gaz quvuri yetib bormagan. Ayniqsa, eng chekka tog'li hudud bo'lgan Sherobod va Oltinsoy tumanlari aholisiga shu paytgacha suyultirilgan gaz o'rtacha hisoblaganda, 50-60 kilometrdan tashib berilardi.
Masalan, Sherobod tumani qishloq ahliga Muzrabotdan ballonlarda propan gaz tashilardi. Sababi, tumanda suyultirilgan gaz saqlash ombori (stansiyasi) yo'q edi. Qo'shni tumandan Oqtosh, Vandob, Xo'jaikon, Qizil olma, Kirshak, Qorabog' kabi mahalla va qishloqlar ahliga gaz ballonlarini yetkazish uchun yetmish-sakson kilometr yo'l bosishga to'g'ri keladi. Bu esa ortiqcha vaqt, sarf-xarajatdan tashqari, mahsulot tannarxiga ham ta'sir qilardi. Ayrim chekka qishloq xonadonlariga qishning qirovli kunlarida haftalab maishiy gaz ballonlari yetib bormasdi. Buning oqibatini tushuntirib o'tirishning hojati bo'lmasa kerak. Oltinsoylik soha xodimlari esa gaz ballonlarini Denov va Boysun tumanidagi omborlardan to'ldirib xonadonlarga yetkazishardi.
Nihoyat, sabrning oltinga aylanganiga ikki oy bo'layapti. Endilikda aholi xonadonlaridan olingan maishiy gaz ballonlari shu kunning o'zida to'ldirilib egasiga yetkazilayapti. Aholi bunday qulaylikdan xursand, gaz tashib beruvchilar esa ortiqcha sarf-xarajatdan, vaqt yo'qotishdan, odamlarning haqli shikoyat va e'tirozlaridan qutulishdi. Ikkinchidan, Sherobod va Oltinsoy tumanlarida yangidan qurilib ishga tushirilgan ikkita suyultirilgan gaz saqlash omborlari tufayli sakson ming iste'molchiga sifatli xizmat ko'rsatilmoqda. Boshqacha aytganda, agar har bir xonadonda o'rtacha to'rt nafar jon istiqomat qiladigan bo'lsa, uch yuz yigirma mingdan ortiq insonning bu borada ko'ngli xotirjam bo'ldi.
Yana sabrning tagi oltin, degan hikmatning mohiyatini qarangki, yarim asr deganda Sherobod va Oltinsoyda zamonaviy talabga javob beradigan suyultirilgan gaz saqlash ombori bunyod etilib, aholiga binoyidek xizmat ko'rsatilmoqda.
Safar OMON,
“Hurriyat” muxbiri.
SURATLARDA: Yangi qurilib foydalanishga topshirilgan suyultirilgan gaz ombori faoliyatidan lavhalar.