“Уддабурон”ларга алданиб қолманг
Қадрли юртдошлар!
Ер, мулк, уй-жой билан боғлиқ муносабатлар тарихан қадриятимизга айланган. 2024 йилнинг 5 август санасида Давлатимиз раҳбари ватандошларимиз учун муҳим бўлган яна бир тарихий Қонунни имзолади.
Жорий йил 8 ноябрдан миллионлаб юртдошларимиз кутган “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги қонун кучга кирди. Унга кўра 2024-2025 йиллар учун тасдиқланган режа-график (https://kadastr.uz/uz/etirof-etish-reja-jadvali) асосида маҳаллаларда кадастр ходимлари томонидан хатлов ишлари бошланади.
Сизга мурожаат қилишимдан мақсад эса огоҳликка чақиришдир!
Узоқ йиллар давомида ўзи яшаб келаётган уйини қонуний расмийлаштириб олишни ният қилиб юрган инсонлар кўп, аммо вазиятдан фойдаланиб, ноқонуний йўллар билан даромад қилишни режа қилиб юрган “уддабурон”лар ҳам йўқ эмас. Сизларни бундай кимсаларнинг ҳар қандай сўзлари ва ваъдаларига ишонмасликка чақирамиз.
Биринчидан, маҳаллалар аниқ тасдиқланган режа-график асосида хатловдан ўтказилади. Бири қолиб, иккинчисига ўтилмайди, яъни халқ тили билан айтганда, “тезлаштириб беришнинг имкони йўқ!”
Иккинчидан, хатловдан кейин “ЭЪТИРОФ” дастури (https://etirof.kadastr.uz/)га киритилган ҳар бир ҳолат бўйича 15 дан ортиқ вазирлик ва идоралар хулосаларини беради ҳамда турар жойлар космик суратлар ёрдамида таҳлил қилинади.
Учинчидан, хатлов жараёнида қонун билан аниқ белгилаб берилган 8 та тоифага кирувчи ҳолатлар ўрганилади. Ҳозирда эгаллаб олиб, қурилиш қилиб қонунийлаштириб олишни режа қилаётганларга кескин чоралар кўрилади ва бу ишлар ҳам ахборот тизимлари орқали назорат қилинади. Ишонаверинг, “таниш-билиш ўтмайди!”
Ҳурматли юртдошлар, ҳар қандай ҳолатда ҳам фирибгарлик, тамагирлик ёки коррупция ҳолатларига дуч келсангиз, ҳуқуқни муҳофаза қилиш органларига хабар беринг.
Мазкур Қонуннинг адолатли ва самарали ижро этилиши барчамизга бирдек боғлиқ эканлигини ёддан чиқармайлик.
Фаррух ПЎЛАТОВ,
Кадастр агентлиги директори.