Ertamizga daxldor qadam

Bugun yurtimiz, xalqimiz katta bir siyosiy voqelik arafasida turibdi. Joriy yilning 22 dekabr kuni yilimizning eng muhim siyosiy voqealaridan biri — Qonunchilik palatasi, xalq deputatlari viloyat, tuman-shahar kengashlariga saylovlar bo'lib o'tadi.

Konstitutsiyamizda, “mamlakat fuqarolari davlat va jamiyat ishlarini boshqarishda bevosita hamda o'z vakillari orqali ishtirok etish huquqiga egadirlar”, deyiladi. Biz saylovda o'zimizga ma'qul bo'lgan nomzod yoki biror-bir partiya ilgari surayotgan das­tur uchun ovoz berish, ularni qo'llab-quvvatlash vakolatiga egamiz.

Sir emas, bugungi kunda ko'cha-ko'yda, odamlar orasida, ijtimoiy tarmoqlarda, qolaversa, matbuot va televidenieda partiyalarning saylovoldi chiqishlari, debatlar, ularda partiya liderlarining ilgari surayotgan dasturlarining qanchalar dolzarbligi, ko'tarilayotgan muammolarning qanchalar jiddiyligi kabi munozaralarning guvohi bo'layapmiz.

Avvalo, shuni ta'kidlash kerak, bugun xal­qimiz har doimgidan uyg'oq, har doimgidan talabchan. Chunki, ular bugun o'z oldilariga katta maqsadlar qo'yib, marrani baland olgan. Bugun ular har qaysi partiya xalqimizning tub manfaatlari, uning ezgu orzu-intilishlarini ifoda etadigan muhim masalalarni ilgari surishlari tarafdoridir.

Muhimi, yurtdoshlarimiz faqat o'z shaxsiy muammolari bilan yashayotgani yo'q, balki o'z mahallasi, tumani, viloyatidagi har bir muammoga e'tiborli, har bir olib borilayotgan islohotlar o'zlarining ertangi kuniga daxldor deb qarash tuyg'usi uy­g'ongan. Xalqimiz Vatanning ertasi uchun, uning kelajagi uchun mas'ullik shijoati bilan yashamoqda. Aslida, bundan boshqacha bo'lishi ham mumkin emas, bu — bugungi hayot, bugungi zamon talabi.

Yaqinda O'zbekiston Yozuvchilar uyushmasining bir guruh vakillari Sirdaryo viloyatining Sayxunobod tumanida bo'ldik. Aytish kerakki, bugungi Sirdaryo, kechagi Sirdaryodan tubdan farq qiladi. Avvallari biz ko'rganimiz, past­qam uylar o'rniga yangi binolar, ko'rkam inshootlarning bo'y cho'zgani, yo'llarning ravon­lashga­­ni-yu odamlar ruhiyatidagi ko'tarinkilik bizni quvontirdi.

Sayxunobod tuman markazida yangi qurib bitirilgan “Yoshlar xiyoboni” hududga o'zgacha bir ko'rk bag'ishlab turibdi. Ushbu xiyobonning ochilish tadbirida qatnashgan, viloyat hokimi G'afurjon Mirzayev ta'kidlaganidek: “Sir­daryo­ning keng dalalari, musaffo cho'l vohasi kabi ko'ngli ochiq, mehnatdan qo'li qadoq bo'lgan oddiy va sodda odamlari hamisha hurmat va etiborga loyiq. Bugungi kunda bu hududda olib borilayotgan o'zgarishlar, yangilanishlar bunga yorqin dalolatdir”.

Yoshlar xiyoboni” Prezidentimiz tomonidan ilgari surilgan 5 muhim tashabbusga mos va monand besh ayvondan iborat bo'lib, uning birinchi ayvonida madaniyat va san'at yo'nalishida yosh san'atkorlar tomonidan musiqiy chiqishlar nomoyish etildi. Yangi kutubxonada kitobsevar yoshlar bilan viloyat hokimi kitobxonlik haqida suhbat o'tkazadi. Xiyobonning ikkinchi — “Ijodkorlar” ayvonida Sayxunobod tumanidagi “She'riyat shaydolari” o'quv to'garagining o'quvchilari va ustoz ijodkorlar bilan uchrashuv bo'lib o'tdi. Bu yerda yosh ijodkorlar viloyat hokimiga, Prezident nomiga yozilgan tashakkurnomani topshirdilar. Ke­yingi “Oilaviy kitobxon” ayvonida kitobxon buvilar va nabiralar ko'rinishi namo­yish etiladi. To'rtinchi ayvonida yosh rassomlarning iste'dodlari bilan tanishdik. Tadbir so'ngida, Xotira xiyobonida esa nuroniy otaxonlar bilan birga Motamsaro ona xaykali poyiga gullar qo'yildi. Yurtimiz madhiyasi ijro etilib, Vatan bayrog'i baland ko'tarildi. Bu tadbir yig'ilganlar, sayxunobodliklar qalbiga faxr va iftixor tuyg'ularini sol­gan bo'lsa, ajab emas.

Keyingi manzilimiz ushbu tumanning 16-“Shodlik” saylov okrugi, 151-saylov uchaskasida bo'lib o'tdi. Bu yerda bugungi kunda katta siyosiy jarayon oldidan tashkil etilgan saylovoldi faoliyati bilan tanishdik. Ushbu saylov uchastkasida 1529 saylovchilar ro'yxatdan o'tkazilgan bo'lib, muddatidan oldin ovoz beruvchilar uchun jarayonlar boshlab yuborilganining guvohi bo'ldik.

Aytmoqchi bo'lganimiz, bugun yurtimizning har bir chekka tumanida, har bir hududida mana shunday yangilanishlar, o'zgarishlar, olib borilayotgan keng islohotlarning guvohi bo'lib turibmiz.

Bugun yurtimizda yangi davr boshlandi, unda har birimiz o'z sohamizda mana shu yurt ertasi uchun bir g'isht qo'yishga intilmog'imiz zarur. Bunda yaqinlashayotgan saylov jarayonida faol ishtirok etishimiz dolzarb va muhim vazifamiz bo'lib, ochiqlik va oshkoralikni ta'minlashga har birimiz mas'ulmiz. Bugun dunyo, jahon hamjamiyati yurtimizga katta qiziqish bilan qarayapti. Endi ana shu yuksak e'tiborga har tomonlama munosib bo'lib, qat'iyat bilan olg'a intilib, ko'zlagan ulug' maqsadlarimiz sari birgalikda odimlamog'imiz lozim.

Zilola Xo'janiyozova,

O'zbekiston Yozuvchilar uyushmasi a'zosi.

Javob qoldiring

Email manzilingiz chop etilmaydi. Majburiy bandlar * bilan belgilangan

9 + 3 =