Hamma narsa bolalar uchun
Qalovini topsa qor ham yonarkan. Lekin, ana shu qalovini topish uchun yarim asrdan ko'proq muddat kerak bo'lganligini aytsak, yo ishonasiz, yo ishonmaysiz. Bugun faoliyat ko'rsatayotgan Muzrabot tuman tibbiyot birlashmasiga qarashli markaziy shifoxona majmuasi o'tgan asrning oltmishinchi yillarida qurilgan. Undan buyon necha martalab joriy va kapital ta'mir qilingan. Har yili qanchadan-qancha mablag' sarflanib, bo'yab-bejalsa-da, shifoxonaning bir qavatli bolalar bo'limi mutlaqo yaroqsiz holga kelib qolgandi. Shu sababli bo'lim bir necha bor boshqa joylarga ko'chirildi ham.
Nihoyat, qor yonadigan fursat kelgan ekan, ikki yil oldin “Obod markaz” davlat dasturiga tushirildi. Bayram arafasida “Asadullayev Firdavs” xususiy korxonasi bunyodkorlari tomonidan uch qavatlik 30 o'ringa mo'ljallangan bolalar bo'limi va 6 o'rinli intensiv palatani o'z ichiga olgan shifoxona foydalanishga topshirildi.
— Bolalar bo'limi binosini qurish va zamonaviy tibbiy asbob- uskunalar bilan jihozlash uchun 11 milliard 561 million so'm mablag' sarflandi. Bundan tashqari, bolalar bo'limida so'nggi rusumdagi 9 o'rinli anesteziologiya-reanimatsiya asbob-uskunalari o'rnatildi. Bolalar kasalliklarining oldini olish, bemorlarni samarali va aniq davolash uchun tashxislovchi ultratovush, EKG apparatlari, labaratoriya-diagnostika hamda travmatologiya punkti xonalari ham barpo etildi. Bugungacha bo'limning shoshilinch tibbiy markazi ham moslashtirilgan xonalarda faoliyat ko'rsatib kelardi. Yangi bino tufayli bu bo'lim shifokorlari va bemorlari uchun ham qo'lay shart-sharoit yaratildi. Sohaga qaratilgan e'tibor va yaratilgan zamonaviy qulayliklar uchun Prezidentimiz va hukumatimizdan minnatdormiz, — deydi Muzrabot tuman tibbiyot birlashmasi bosh shifokori Abdurashid G'aniyev.
Yangi bolalar shifoxonasining ochilish marosimida viloyat, tuman hokimliklari, jamoatchilik vakillari, OAV xodimlari, ota-onalar ishtirok etib, bunday e'tibor va qulaylik uchun dil izhorlarini aytishdi. Shu kuni jamoatchilik tuman tarixidagi yana bir muhim voqeaga guvoh bo'ldi. Tumanning Hakim Termiziy nomli xo'jaligi hududida joylashgan paxta zavodi massivida bir martalik shpris ishlab chiqaruvchi mini zavod ish boshladi. Loyiha qiymati 48 milliard 150 million so'm bo'lgan bu sanoat korxonasini tumandagi “Alpomish servis-invest” xususiy korxonasi quruvchilari bunyod etishgan.
Oyiga 200 ming shpris ishlab chiqarishga mo'ljallangan mini zavod ishga tushurilishi munosabati bilan 70 nafar mahalliy ishchi va mutaxassislar foydali mehnat bilan band bo'ldi.
— Kelgusida faoliyatimizni yanada kengaytirish niyatidamiz, — dedi yangi korxona rahbari, tadbirkor Hasan Panjiyev. — Maqsadimiz respublikamiz hamda vohamiz tibbiy sanoatini rivojlantirishga munosib hissa qo'shishdir.
Safar OMON,
“Hurriyat” muxbiri