Mehnatdan shuhrat topib…
Vaqt shamoldek o'tib boradi. Mana bahor, yoz, kuz o'tib, qishning ayozli kunlari ham boshlandi. Tog'larga qor tushdi. Lekin Toshkent-Termiz avtomagistralidan kelaverishda Kallamazor qishlog'idan toki Sherobod shahrigacha yo'lning chap tomonida turnaqator tizilib, noqulay ob-havo sharoitiga qaramasdan har biri handalakday keladigan qop-qop anorlarni sotayotgan qizlarga, ayollarga ko'zingiz tushmasligiga ilojingiz yo'q.
Safarga chiqqan har bir kishi shu yerda to'xtab, cho'g'dek tovlanib turgan Sherobod anoridan xarid qilmay o'tmaydi. Eng avvalo, narxi cho'ntakbop, kilosi sifatiga qarab besh, o'n ming so'm arzon. Sababi, ular olib sotar emas, haqiqiy dehqon-da!
Shu yil kuzning birinchi oyida Qozog'istondagi “TL Nika Kegen” korxonasi vakillari vohaga kelib “Sherobod anor impex” va Denovdagi “Rossion Vark” MChJlar bilan 50 million AQSh dollariga teng bo'lgan shartnoma imzolashgandi. Bunga ko'ra Surxon diyorida yetishtirilgan sarxil anor, uzum, xurmo, limon, pomidor va ko'katlar eksport qilinishi lozim. Bugungacha 22 ming tonnadan ziyod meva va sabzavot mahsulotlari hamkorlarga yetkazib berilgan bo'lib, buning eksport qiymati o'n million AQSh dollaridan ortiqdir.
Quvonarlisi, hosil yetishtirish tajribasi va saqlash imkoniyati bo'lgan bugungi dehqon yilning istalgan faslida mahsulotini eksport qila oladi. Bu borada Sherobod tumanining tadbirkor dehqonlari katta tajribaga ega. Buni quyidagi raqamlar ham isbotlaydi. Tumanda 48 ta mahalla fuqarolar yig'ini bo'lib, shundan 33 tasida istiqomat qilayotgan aholi anorchilik bilan shug'ullanib keladi. Boshqacha qilib aytganda, tumandagi tomorqador aholining 60 foizi anor mevasi va ko'chatini yetishtirish hisobidan daromad ko'rishadi. Oldinroq aholi tomorqasi hisobidan ming gektarda anor daraxti parvarish qilingan bo'lsa, endilikda bu raqam 3 ming gektardan ortiq. Tumandagi dehqonlar salohiyatini va bu yerdagi mavjud imkoniyatni to'g'ri baholay olgan “Sherobod anor impex” MChJ jamoasi korxonasini eng so'nggi rusumdagi zamonaviy texnologiya bilan jihozlagan. Bu yerda 6 ming tonna anorni qadoqlash, 2 ming tonnasini esa sharbatga aylantirish imkoniyati mavjud. Bu esa dehqonlarga ham, MChJ jamoasiga ham mo'maygina daromad keltiradi degani.
Mutaxassislarning aytishicha, Sherobodning tuproq unumdorligi, iqlim sharoiti aynan anor yetishtirishga juda mos. Birgina misol, sherobodlik otaxon Abdurahmon Karimov nafaqada bo'lishiga qaramasdan o'g'illari, nabiralari bilan tomorqasida ming tup anorni parvarishlaydi. O'tgan yili 12 tonna anor olgan bo'lsa, bu yil usta bog'bon 15 tonna sifatli hosil yig'ishtiribdi. Bundan tashqari, qo'shni tuman va viloyatlarni anor ko'chati bilan ta'minlaydi. Ha, otaxon bog'dorchilikning hadisini olganlardan.
— Bog'imizga eng sara nav anor ko'chatlarini ekkanmiz. Faqat mehnatdan qochmasangiz, agrotexnikasini bilsangiz bo'lgani, daromaddan bebahra qolmaysiz, — deydi Abdurahmon bobo Karimov. — Kelgusi yilning may oyigacha anor mevasini saqlay olamiz. Bu yil, ayniqsa, men uchun juda omadli keldi. Oilasi, nabiralari uchun umrguzaronlik qilayotgan mendek bir mo'ysafidga Prezidentimiz farmoniga ko'ra “Mehnat shuhrati” ordeni berishganini eshitib, boshim ko'kka yetdi. Bu birgina menga emas, butun boshli Surxon vohasi tomorqadorlariga, qolaversa, Sherobod anorchilik maktabi zahmatkashlariga berilgan yuksak mukofotdir, — deydi u.
Safar OMON,
“Hurriyat” muxbiri