Бирни кўриб фикр қил…

Сирожиддин САЙЙИД,

Ўзбекистон халқ шоири

Бирни кўриб фикр қил,

       Бирни кўриб зикр қил.

Бирни кўриб ўкинсанг,

       Бирни кўриб шукр қил.

Ҳаёт – сабру бардошдир,

       Неъматлари талошдир.

Гоҳи кўзингда ёшдир –

Бирни кўриб фикр қил,

       Бирни кўриб шукр қил.

Ота-бобонг оч-наҳор,

       Меҳрга зор, нонга зор,

Қийналган кунларинг бор.

Бирни кўриб фикр қил,

       Бирни кўриб шукр қил.

Дунёга боқ – кенг маскан,

       Хордир қанча жону тан,

Ким юпун, ким беватан,

Бирни кўриб фикр қил,

       Бирни кўриб шукр қил.

Ўз юртингда – лолалар,

       Беланчаклар, аллалар,

Бетакрор бу паллалар –

Бирни кўриб фикр қил,

       Бирни кўриб шукр қил.

Буғдойзор шу тупроғинг,

       Кўзга сурт ҳар бошоғин,

Жаннатдир ҳар бир чоғинг –

Бирни кўриб фикр қил,

       Бирни кўриб шукр қил.

Инсон умри ғанимат,

      Ғаниматдир ҳар неъмат,

Тириклик – катта давлат –

Бирни кўриб фикр қил,

      Бирни кўриб шукр қил.

Ичиб бўлмай жомингни,

      Ярат яхши номингни.

Юрт кўрсин камолингни –

Бирни кўриб фикр қил,

      Бирни кўриб шукр қил.

Элда қанча ному ёд,

      Ўғил-қиздандир мурод.

Ҳар кун уқтирар ҳаёт:

Бирни кўриб фикр қил,

      Бирни кўриб шукр қил.