Ягона ватанмиз, битта халқдирмиз
Сайёра ТЎЙЧИЕВА
Икки дарё пойин ўпган гул диёр,
Осиё юраги бўлган шул диёр.
Пок ният, пок амал, азим келажак —
Барчасига Ватан бўлган шул диёр,
Бирлашсак шижоат, азму шаҳддирмиз,
Ягона Ватанмиз, битта халқдирмиз.
Бобом эккан ниҳол зўр ҳиммат менга,
Момомнинг алласи чин ҳикмат менга.
Отамдан, онамдан меросим — Ватан,
Уни асрамоқлик саодат менга.
Томирда оққан қон, шиддат, жаҳддирмиз,
Ягона Ватанмиз, битта халқдирмиз.
Дунёнинг бешигин тебратган бу эл,
Йўқдан бино қилган, яратган бу эл.
Карвонида илму маърифат ташиб,
Не-не довонларни титратган бу эл —
Шиддатим боламда, яна қалқ дермиз,
Ягона Ватанмиз, битта халқдирмиз.
Қадим тарих йўли кимга пинҳондир,
Кечам ҳам бугуним сенга аёндир.
Менинг доно халқим, донишманд халқим —
Ҳамиша яхшилик, мардлик томондир,
Мардона боболар йўли-аҳддирмиз,
Ягона Ватанмиз, битта халқдирмиз.
Ер юзин ёндирар уруш тўзони,
Гўдаклар фарёди тутар самони.
Менинг Ватанимда шодиёна тўй —
Маърифат замони, миллат замони,
Темур тутган байроқдек якка шаҳддирмиз,
Ягона Ватанмиз, битта халқдирмиз.
Айтай қай бирини — баҳодирларим,
Ватан — орим деган қанча зўрларим.
Муқаддас юрт шаъни кўксида тумор —
Дунёлар таниган Жавоҳирларим.
Рақибни мот айлаб турган тахтдирмиз,
Ягона Ватанмиз, битта халқдирмиз.
Ўз-ўзидан бунёд бўлмас иморат,
Юрт тақдири номус ила жасорат.
Халқ қисматин ўзин қисмати деган —
Бедор зотнинг ҳаётидан иборат.
Қадамлар залворли — қутлуғ аҳддирмиз,
Ягона Ватанмиз, битта халқдирмиз.
Эй, илм-маърифат, нурлар, бирлашинг,
Юрагида олови борлар, бирлашинг.
Эй, Ватан тарихин битаётганлар —
Алломаи замон, пирлар, бирлашинг,
Бирлашсак, эл деган ёруғ бахтдирмиз,
Ягона Ватанмиз, битта халқдирмиз,
Ягона Ватанмиз, битта халқдирмиз!