Оқила журналист бўлади, шекилли…
Катта қизимиз Оқилахон бу йил 1-синфга чиқади. Ҳозирданоқ лотин ва кирилл алифбосида бемалол ўқийди, ёзади. Арифметик амалларга уста. Фикрлари теран. Кўп савол беради. Баъзан сўровларига онаси иккимиз ўша заҳоти жўяли жавоб тополмай қоламиз.
Хуллас, давлат мактабида ўқитадиган бўлдик.
Ҳужжат тайёрлашга чиққан кунимиз чорраҳага ўрнатилган катта паннодаги “Янги Ўзбекистон” деган ёзувни кўриб, савол бериб қолса денг: “Дада, биз эски Ўзбекистонда яшаймизми ёки янгисидами?”
— Янгисида яшаймиз, қизим, янгисида, — гапни қисқа қиламан.
— Эски Ўзбекистон қайси томонда ўзи? — савол беришда давом этади у.
Қандай тушунтиришни билмай, гапни бошқа мавзуга бураман.
Поликлиникадан маълумотнома олиш чоғида бироз навбат кутишга тўғри келди. Ланг очиқ эшиклардан бирининг ички қисмига ёпиштирилган, ислом динида шифокорнинг қандай мақомларга эга эканлиги эслатилган ёзувлар қизимнинг эътиборини тортибди. Эслатманинг якунида “Шифокорни беҳурмат қилган одам пайғамбар (с.а.в.)ни беҳурмат қилган билан баробар экан” деган жумлалар бор эди.
— Дада, нотўғри ёзишмаганми булар? Шифокор пайғамбар эмас-ку, — дея ёзувни ўқий туриб савол берди у.
Тўсатдан берилган бу каби саволларга дарҳол жавоб қайтаришга ўйланиб қолади одам. Нима дейишни билмай:
— Буни қайси китобдан олиб ёзганини уни ёпиштирган доктордан сўраб кўриш керак, — деб жавоб бердим…
Поликлиникада ишимиз битиб, ҳовлига чиқсак, “Тез ёрдам” машинаси келиб қолди. Ундан тушган шифокорлар бошини ушлаганча бувисининг етовида бинодан ташқарига чиқиб келаётган, кўринишидан 8-9 яшар қиз томон югуришди. Боши ёрилган, шекилли, боёқишнинг.
Бу вазиятни кузатиб турган Оқилахон яна мени саволга тутди:
— Дада, ҳамма докторлар шу ерда бўлса, нимага “Тез ёрдам” чақиришади?
Бу саволга сиз нима деб жавоб берган бўлардингиз?
Бу қизимиз журналист бўлади, шекилли…
Нурилло НЎЪМОНОВ.