1 oktyabr – O'qituvchi va murabbiylar kuni
Buxorolik Muharram Kamolova Jondor tumanidagi 2-ixtisoslashtirilgan davlat umumta'lim maktab-internatida ona tili va adabiyoti fanidan saboq beradi.
O'ziga xos pedagogik mahorati bilan dars samaradorligini oshirayotgan muallima shuningdek, ma'naviy-ma'rifiy tadbirlarni tashkil etish, fan to'garaklari va klublar faoliyatini olib borishda faollik ko'rsatmoqda. Muharram Kamolova “Yilning eng yaxshi fan o'qituvchisi”, “Yilning eng faol ma'naviyat targ'ibotchisi” ko'rik-tanlovlarida muvaffaqiyatli ishtirok etgan, “Xalq ta'limi a'lochisi” ko'krak nishoni bilan taqdirlangan.
Abdulla Oripov,
O'zbekiston xalq shoiri
Muallimlarga
Nechog' baxtiyorman, ta'zimda shu tob,
Sizning sha'ningizga bitmoqdaman bayt.
Ne odam bo'lardim, qo'limda kitob
Biror harf tanimay tursaydim loqayd.
Siz-ku “Alifbo”dan “Qomus”gacha to
Bari-barisini tanitgan ustoz.
Ilk bor Siz ko'rsatgan duraxshon Zuhro,
Bu kun she'rim ichra tashbihdir mumtoz.
Siz mo''jaz yurakda yoqolgan yog'du,
Oqibat quyoshdek socha olur nur.
Buyuklar haqqiga qasamyod gap bu:
Sizdan boshlanadi asli Tafakkur.
Olamda ko'p erur muborak onlar,
Tabarruk zotlar ham garchand ko'p erur.
Sizgadir ilk rahmat aziz insonlar,
Munis muallimlar sizga tashakkur!