Mard maydonda sinalgay (G'olib va muzaffar o'zbek o'g'lonlariga)

                                                Sirojiddin Sayyid,

                                                O'zbekiston xalq shoiri

 

Shavkatli zamonlarning

                       o'g'lonlari sizdirsiz,

Biringiz qosh bo'lsangiz,

                       birovingiz ko'zdirsiz.

Osonmi bu dunyoda

                       yurt dong'ini taratmoq,

Olam ahlin yuzini

                       bir zarbingga qaratmoq.

 

Dunyo o'zi nimadir –

                       cheksiz kurash maydoni,

Tish qayrab tursa bunda

                       arsloniga arsloni.

Dilbandingni sen o'zing

                      qo'llab turgil, otajon,

O'zbekiston, jonajon,

                       O'zbekiston, onajon!

 

Chin farzandlar kurashgay

                       nomus uchun, or uchun –

Dilda Vatan bor uchun,

                       Dilda Vatan Yor uchun.

 

Kurash nadir: goh yengmoq,

                       gohida yengilmoqdir,

Engilmog'ing osonu

                       yengmog'ing qiyinroqdir.

Pahlavon Mahmudlarning

                       tumori bo'yningizda,

Qadrdonlar sog'inchi,

                       xumori ko'nglingizda,

 

Biringiz – yigirma yosh,

                       biringiz yigirma besh,

Dunyo nadir, eng avval

                       iddaosin qilgay pesh.

 

… Qalqib turdi ko'zimda

                       jolalarim – jonlarim,

Nonu tuzin pok-halol

                       oqlolgan o'g'lonlarim!

Sha'ningizga she'r bitdim,

                       tunlarim siyoh bo'ldi,

To'kkan sevinch yoshimdan

                       har so'zim giyoh bo'ldi.

 

Chin farzandlar kurashgay

                       nomus uchun, or uchun –

Dilda Vatan bor uchun,

                       Dilda Vatan Yor uchun.

Sangardak suvlaridan

                       ichib ketgan bolamsan,

Tomirimsan, giyohim,

                       maysamdirsan, lolamsan.

Bir mushtingda millatning

                       zalvori bor, yuki bor,

Termiziy bobolarning

                       duolarin kuchi bor.

 

Alp erlarning naslisan,

                       Alpomishlar avlodi,

Bahodirsan alpqomat –

                       Jaloliddin zuryodi.

Etti iqlim zo'rlarin

                       yenga olgan farzandim,

Dilu joni jonimga

                      payvasta ham payvandim,

 

Yot ellarda hayiqmay

                       maydonga tushganingda,

Ringmas, go'yo o't-olov

                       sandonga tushganingda –

Ko'ksim aro potirlab

                       qushga aylandi dilim,

Har zarbingdan mening ham

                       mushtga aylandi dilim.

 

Ay bolam-ay, o'payin

                       qoshlaring, qarog'ingdan,

Olam aro eng baland

                       ko'targan bayrog'ingdan!

Shavkatli zamonlarda

                       sha'nu shavkat yaralgay,

Shunday yuksak onlarda

                       xalq va millat yaralgay!

 

Dilbandingni sen o'zing

                       qo'llab turding, otajon,

O'zbekiston, jonajon!

                       O'zbekiston, onajon!

Mard o'g'lonlar olishgay

                       nomus uchun, or uchun,

Dilda Vatan bor uchun,

                       Dilda Vatan Yor uchun,

Dilda Vatan Yor uchun!