Ilk sevgimni eslatdi yaproq…
Muallif haqida: Ozod XUShNAZARZODA — 1951 yili Ohangaron tumanida tug'ilgan.
Muallifning “Soat chiqillaydi”, “Qarshingizga keldim”, “Millatim, dardingga darmonman”, “Atirgul” nomli she'riy to'plamlari chop etilgan. O'zbekiston Yozuvchilar uyushmasi a'zosi.
Uchqur otday tinmay yugurmoqda vaqt,
Go'yoki chaqmoqday o'tmoqda umrim.
Bisyor anduh ichra o'tmoqdadir vaqt,
Zanjirlab keladi uni tashlagim.
Vo ajab uyquga ko'zlar to'ymaydi,
Zulukday tunlarim o'tmoqda bekor.
Bunchalik uzun tun ham bo'lmasaydi.
Qancha soat uyqu, qanchasi bedor…
Beldan quvvat ketdi, og'riydi tanim,
Xasta oyoqlarim bazo'r sudralar.
Hazin jilmayadi oltmish besh yoshim,
Oldinda ne qismat, Yaratgan bilar.
Sog'inib yashadik uchrashuv onni,
Aziz sinfdoshim — do'stu yoronni.
Bu dunyo g'animat — ne'mati ham shu,
Ey do'stim, hayotning shudir hikmati.
Bir ajib, bir sirli quyulmoqda shom,
Masjiddan yog'ildi ajoyib azon.
Necha kun qalbimga bermagan orom,
So'ngsiz xayolimni ko'mvordi xazon.
* * *
Istanbul lavashin joyida yedim,
Dehli chavatisi ham chakki emas.
Kimki nima aytsin o'zimcha dedim,
Har kim o'z taomin hech yomon demas.
Olloh ne'mati ko'p, olam g'oyat keng,
Bugun bormoq mumkin turli tomonga,
Hech qanday mo''jiza kelolmaydi teng,
O'zbek tandiridan uzilgan nonga…
* * *
Ey, do'stim, dunyoga mehmon bo'ldik biz,
Ollohimga qutlug', iymon bo'ldik biz.
Bir g'aroyib, turfa zamon ko'rdik biz,
Afsus, dunyo o'zi bir damlik ekan…
Ey, do'stim, yashashga ajib imkon bor
Ruhim tetik, xushnud, belda darmon bor
Onam erta ketdi, dilda armon bor,
Afsus, dunyo o'zi bir kamlik ekan..
Ey, do'stim, bir kuni biz ham ketarmiz,
Yaratgan Egamga yetarmiz.
Jannat rayhonlarin obod etarmiz,
Afsus, dunyo o'zi bir damlik ekan….
* * *
Eh, bu foniy dunyoda,
Na bir do'st, na yor qoldi.
Bedorlikda oh cheksam,
Xotiralar avj oldi.
Do'st-yoronning nazdida,
Tetik, shahdam yuraman.
Lekin men-chi, aslida,
Yurak-bag'ri poraman.
Men gulimni yo'qotdim,
Xuddi tirik murdaman.
Tanam bazo'r sudralar,
Bir oyog'i go'rdaman.
Hiralashar ko'zlarim,
Qaltiraydi qo'llarim.
Ba'zan o'yga tolaman,
Loyqalandi yo'llarim.
Umr, qarang, tez o'tdi,
Umr o'tib ketdi-ya.
Hayotim nihoyasida,
Nafas olyapman yolg'iz…
Bu qandayin ko'r dunyo,
Yaxshi uchun zindondir.
Yovuz uchun zo'r dunyo,
Boylik, zo'rlik, imkondir.
Kimdir unvon olmoqda,
Kimdir esa nimarsa,
Goho ash'orlar bitdim,
O'qib ko'rsam…hech narsa…
* * *
Ko'hna daftar…Varaq qatida,
Ilk sevgimni eslatdi yaproq…
Yillar olib ketdi kaftida,
Bugun sevgim bir siqim tuproq…
Ayb kimda deb izlamoq nechun?
Endi afsus….kimga ham darkor!
Yashayapman sevgimiz uchun,
Yo'q, sevgimiz o'lmagan, bekor!