Xalq diplomatiyasi rivojida xalqaro axborotning ahamiyati
Xalqaro Axborot kuni munosabati bilan O'zbekiston Jurnalistlari ijodiy uyushmasi va O'zbekistonda Shanxay Hamkorlik Tashkilotining Xalq diplomatiyasi markazi hamkorligida “Xalq diplomatiyasi rivojida xalqaro axborotning ahamiyati” mavzusida matbuot anjumani bo'lib o'tdi.
Milliy matbuot markazida o'tkazilgan mazkur tadbirda Xalq diplomatiyasi markazi rahbari Qobiljon Sobirov, O'zbekiston Jurnalistlari ijodiy uyushmasi raisi Olimjon O'sarov, Xalq diplomatiyasi markazining ijodiy guruhi rahbari, adabiyotshunos olim, tarjimon, filologiya fanlari nomzodi Zuhriddin Isomiddinov o'z ma'ruzalari bilan qatnashdilar.
Tadbirni kirish so'zi bilan ochgan Xalq diplomatiyasi markazi rahbari Qobiljon Sobirov Prezidentimiz tomonidan qabul qilingan “O'zbekistonda Shanxay Hamkorlik Tashkiloti Xalq diplomatiyasi markazi tashkil etilishini davlat tomonidan qo'llab-quvvatlash chora-tadbirlari to'g'risida”gi qarorini eslatib, unda ShHT mamlakatlari o'rtasida axborot sohasidagi hamkorlikni rivojlantirishga ko'maklashish, axborot resurslarini shakllantirish hamda ShHTning maqsad va vazifalari, faoliyatining ustuvor yo'nalishlari va acocli prinsiplarini keng tushuntirish maqsadida ommaviy axborot vositalari bilan hamkorlik qilish, ShHT mamlakatlarining madaniy-gumanitar sohada erishgan yutuqlari to'g'risida axborot tahliliy materiallar tayyorlash va ularni muntazam chop etib borishda jurnalistlarga doimiy ravishda yaqindan hamkorlik qilishdan manfaatdor ekanliklarini ta'kidladi.
Davra suhbatida madaniy, ilmiy, ma'rifiy dasturlarni tashkil etish, o'zaro delegatsiyalar almashinuvi, dolzarb mavzudagi xalqaro forumlar, badiiy ko'rgazmalar, musiqa festivallari va sport tadbirlarini o'tkazish doirasida Markaz bilan hamkorlikda amalga oshirilgan ishlar to'g'risida ishtirokchilarga ma'lumotlar berildi. Shu bilan birgalikda tashkilot tomonidan chop etilgan “O'zbekistonda Shanxay Hamkorlik Tashkilotining Xalq diplomatiyasi markazi”, “Sakkiz elning sakson ulug' siymosi”, “Barqaror rivojlanishda yetakchi ayollar rolini oshirish” kabi kitoblar taqdimoti ham o'tkazildi.
Kecha so'ngida yurtimizda amalga oshayotgan islohotlarni xalqaro miqyosda targ'ib etishda faol qatnashgan bir guruh jurnalistlarga markaz tomonidan esdalik sovg'alari topshirildi.
Kamoliddin RO'ZIMATOV