Bolalar — davlat e'tiborida

Har bir muammoga ato qilingan kunida yechim topiladi. Nihoyat, Surxondaryoda ko'zi ojiz bolalar uchun 180 o'rinli   yangi ixtisos­lashtirilgan maktab-internati qurilib foydalanishga topshirildi. Kim ham farzandining kamolini ko'rishni, baxtli bo'lishini istamaydi. Eng muhimi, imkoniyati cheklangan o'quvchilarning kasb-hunar o'rganishi,   hayotda o'z o'rnini topib   ketishlariga kafolat beruvchi barcha   qulayliklarga ega zamonaviy maktab- internatini ota-onalar ancha yillardan buyon faqat orzu qilib kelishardi.

Viloyatning Angor tumanida 14 milliard so'm mablag'   evaziga bunyod etilgan maxsus maktab-internati bugungi rivojlangan   davr talablariga to'liq javob   bera oladi, desak   mubolag'a bo'lmaydi. O'quvchilarning ta'lim olish bilan birga o'zlari yoqtirgan kasb sirlarini   o'zlashtirishi uchun bu   dargohda duradgorlik, chilangarlik, poyabzal tuzatish, santexnika, elektr jihozlarini tuzatish, tikuvchilik, zardo'zlik, sartaroshlik, hamshiralik,   loyihalash va dizaynerlik   ishini o'rgatishga ixtisos­lashtirilgan maxsus   xonalarda zamonaviy asbob-uskunalar o'rnatilib, zarur ko'rgazmali o'quv-qurollari bilan be­zatilgan.

Endigi masala   bu yerdagi tarbiyachi- o'qituvchilar va   o'quvchilarning o'zlariga   havola. Maktab- internatida  2 ta informatika, 16 ta   o'quv hamda fan   xonalari   eng so'nggi   rusumda jihozlangan. Bundan tashqari maxsus kutubxona, madaniyat zali, tibbiyot xonasi, sport maydonchasi, 150   o'rinli yotoqxona, oshxona,   sartaroshxona, texnologiyalar   xonasi o'quvchilar   ixtiyorida.   Bir so'z bilan aytganda, bu dargohdan   imkoniyati cheklangan yigit va qizlar o'rta ma'lumot olish barobarida   u yoki bu kasbni imkon   darajasida o'zlashtirgan holda   mustaqil hayotga yo'llanma   oladilar.

Safar OMON,

“Hurriyat” muxbiri

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

3 + 20 =