Баҳона ортидаги фитна

“Бирни кўриб фикр қил, бирни кўриб шукр қил” деб бежиз айтишмаган-да.

Шу йилнинг 1-2 июль кунлари Қорақалпоғистонда юз берган воқеалар ҳар бир бедор қалбли юртдошимизни оғир, изтиробли ўйларга солди.

Донишманд кексалар шукрни унутиб, ўзини тутолмай, босар-тусарини билмай, бирор ножўя иш қилганга қарата “Тўқликка шўхлик қилма!”, дея танбеҳ беришган.

Савол туғилади — нияти тинч ва фаровон ҳаётимизга рахна солиш, фитна уюштириб, ўзининг ғаразли мақсадларига эришиш учун Нукус шаҳрида одамларни оломон сифатида кўчага олиб чиққанлар кимлар эди? Наҳотки бу фитна Конституциямизга ўзгартириш ва қўшимчалар киритиш бўйича умумхалқ муҳокамаси билан боғлиқ бўлса?

Йўқ, албатта. Бу бир баҳона эди. Чунки Конституцияга ўзгартириш ва қўшимчалар белгиланган тартибда амалга оширилаётган, ҳар   қандай таклиф ва фикрлар, ўринли ёки ўринсиз бўлса ҳам тингланаётган, ўрганилаётган эди-ку? Ҳар ким таклифини эмин-эркин билдираётган эди-ку? Кўчада оммавий тартибсизлик чиқариш, безорилик қилиш, давлат ва жамоат идораларини эгаллашга уриниш, ҳуқуқ-тартибот органлари ходимларининг қонуний талабларига бўйсунмай, уларни аёвсиз калтаклаш, ҳатто ўқотар қуроллардан фойдаланиб инсонларга жароҳат етказиш, одам ўлдириш сингари қабиҳликларни содир этишдан мақсад бутунлай бошқа бўлган. Бундай ҳаракатларни норозилик намойиши эмас, юртга, унинг тинчлигига хиёнат деб айтиш ўринлидир.

Яна шуни айтиш керакки, кейинги беш йил ичида Президент Шавкат Мирзиёевнинг сиёсий иродаси туфайли мамлакатда сўз ва матбуот эркинлиги тикланди. Одамлар ўз ҳақ-ҳуқуқларини бемалол талаб қиладиган, матбуот эркинлигидан фойдаланадиган, давлат ва жамият ҳаётида фаол иштирок этадиган бўлишди. Расмий идораларнинг одамларни эшитиш қулоқлари очилди. Жойларда ўтказилаётган қабулларда қанчадан-қанча муаммолар ўз жойида, жамоатчилк вакиллари, маҳалла фаоллари иштирокида ҳал этилмоқда.

Ё эркинлик дегани ҳар ким хаёлига нима келса, шуни қилиши, ёшларни тўғри йўлдан чалғитиши мумкин деганими? Асло. Қонунлар амалда экан, ҳар қандай ноқонуний ҳатти-ҳаракат учун жазо муқаррардир.

Қолаверса, бундай ғаразли ишлар ўз-ўзидан, бирдан содир бўлиб қолмайди. Бу намойиш­ларни ўтказиш орқали мамлакат барқарорлигини издан чиқариш, юрт мустақиллигига рахна солиш каби қабиҳ мақсадлар учун маълум тараддуд ва тайёргарликлар қилингани аён. Эҳтимол четда туриб бу қабиҳликларга “ҳомийлик” қилган, йўл-йўриқ кўрсатган баъзи бир кучлар режаси энди Ўзбекистонда ҳам нотинчликни, парокандаликни келтириш эди.

Бу ташвишли воқеага ўз вақтида чора-тадбир кўрилгани, Давлатимиз раҳбарининг 2-3 июль кунлари Қорақалпоғистонга бориб, республика фаоллари билан учрашиб, мурожаат қилгани, ҳатто Нукусдаги маҳаллаларда бўлиб халқ вакиллари билан тўғридан-тўғри мулоқот қилгани мардонавор иш бўлди. Бу нафақат қорақалпоғистонликлар, балки бутун Ўзбекистон халқини ғурурлантирди. Юртнинг ўз Эгаси борлиги кўнгилларга куч берди, халқимизнинг эртанги кунга бўлган ишончини янада мустаҳкамлади. “Тўлиқ ишонч билан айтаманки, Қорақалпоғистонда амалга оширилаётган ижобий ўзгаришлар бундан буён ҳам албатта изчил суръатларда давом эттирилади. Чунки Қорақалпоғис­тоннинг тақдири — бу Ўзбекистоннинг тақдири, қорақалпоқ халқининг бахти ва фаровонлиги — бу бутун ўзбек халқининг бахти ва фаровонлигидир”, — деди Президентимиз.

Бу учрашувларни “Ойнаи жаҳон” орқали кўриб билдикки, Юртбошимизнинг сўзларидан ҳая­жонга тушганча кўзларига ёш олиб сўзлаган бир нечта қорақалпоғистонлик фаол аёллар, оналарнинг дил сўзлари ҳам юракдан айтилди. Улар ўзбек ва қорақалпоқ эли доимо якдил эканлиги ҳақида самимий гапирдилар.

Нукусдаги воқеаларда иштирок этган, юрт тинчлигига рахна солмоқчи бўлганларнинг аксарияти ёшлар экан. Бу ҳаракатлар қорақалпоқ элининг иши эмас, балки онги заҳарланган, алданган, кимларнингдир қутқусига, ёлғон ваъдаларига учган ёшларнинг ва айрим ёши катта бўлса ҳам фикри бузуқ касларнинг, сох­­та “демократ”, сохта “лидер” ларнинг иши эканлиги аён бўлмоқда.

Буни қарангки, куни-кеча ижтимоий тармоқларда Нукусда кўчага чиқиб, ўзларича сохта ғоя­лар, талабларни байроқ қилган нобакорларга олдиндан пул ва инсонга кучли таъсир ўтказувчи психотроп дорилар, спиртли ичимликлар тарқатилгани, айрим намойишчиларнинг исми-шарифи ва олган пуллари ёзилган “ведомост”лари эълон қилинди. Мана, юзсизларнинг ҳақиқий башараси. Демак, бу ишларга чиндан ҳам аввалдан тайёргарлик кўрилган, молиялаштирилган,— дейилади “Водители Каракалпакистан” телеграм каналида.

Албатта, бу воқеалар ҳали чуқур таҳлил этилиши, қандай сабаблар, омиллар роль ўйнагани, бу жиноятнинг бошида кимлар тургани ипидан-игнасигача ўрганилишига шубҳа йўқ.

Нима бўлганда ҳам бу воқеа­лардан сабоқ чиқариш жуда муҳим. Чунки дунёда ҳамиша ғайр­­ли кучлар юртларнинг тинч­лигини, осойишталигини айнан ана шундай йўллар билан издан чиқариши, барбод қилишга уриниши сир эмас.

Давлатимиз Қорақалпоғистон учун, қорақалпоқ эли учун ҳам ҳеч нарсани аяётгани йўқ. Айниқса, сўнгги 5-6 йил ичида рес­публика иқтисодиёти, аҳолиси фаровонлиги йўлида амалга оширилган ишлар, бунёдкорликлар сўнгги 30-40 йилда ҳам бўлган эмас. Биргина Мўйноқдаги бунёдкорлик ишларини мўъжизага тенглаштириш мумкин. Республика аҳолисининг даромади, яъни жон бошига келадиган ялпи даромад 2020 йил якуни бўйича 3 баробарга ошгани бунинг ёрқин далилидир. Юзлаб янги корхоналар, уйлар, мактаб ва боғчалар, замонавий йўллар қурилди, яна қурилмоқда. Буларнинг бари ким учун — қорақалпоқ эли учун!

Оролбўйидаги экологик ислоҳотлар давлат сиёсати даражасига кўтарилгани, аҳолининг ижтимоий ҳимояси йўлидаги саъй-­ҳаракатлар… ҳамма-ҳаммаси шу азиз эл бугуни, эртаси ва ёруғ келажаги учун эмасми?

Шубҳасиз азалдан бир дарахтнинг томири каби униб ўсган ўзбек қорақалпоқ элини ҳеч ким ажрата олмайди. Президентимиз Шавкат Мирзиёевнинг қорақалпоғистонлик фаоллар олдида қилган мурожаатидаги: “Барчамиз учун Ватан битта. Бизни ягона, улуғ бир мақсад бирлаштиради. У ҳам бўлса, юртимиз тинчлиги, Ватанимиз тараққиёти, халқимиз фаровонлигидир. Барчамиз биргаликда Янги Ўзбекистон ва Янги Қорақалпоғистонни албатта барпо этамиз”, — деган сўзлари ҳар бир ватандошимизнинг юрагида акс-садо берди. Бу улуғ ният ижобатини кўриш барчамизга насиб этсин!

Абдирасул ЖУМАҚУЛ,

журналист

Янгиликларни дўстларингизга улашинг

Fikr bildirish

Email manzilingiz chop etilmaydi. Majburiy bandlar * bilan belgilangan

18 − 4 =