Sizning oy-yillaringiz safarlarda kechmishdir

Sirojiddin SAYYID,

O'zbekiston xalq shoiri

(O'zbekistonda xizmat ko'rsatgan madaniyat xodimi, Bobur nomidagi xalqaro jamoat fondi raisi Zokirjon Mashrabovga)

 

Elu yurtda mo''tabar,

               mashhur ham ashraf bobo,

To'qson yoshga kiribsiz,

           Zokirjon Mashrab bobo.

To'qson yoshkim, bu salkam

          yuz yil – bir asr demak,

Mehnatu zahmatlardan

             tiklangan qasr demak.

Sizda Mashrab boboning

             jununi, javloni bor,

Qirq yashar Boburshohning

           jo'shgan shiddat, qoni bor.

Nechog'li sharaflidir

           umr ko'rmoq bosharaf,

Shunday qutlug' damlarga

           Siz bo'lmishsiz musharraf.

Siz kezgan o'lkalarning

             har qarichi jon qadar,

Andijondan to Kobul,

             Hirot, Hindiston qadar.

Shomdan tortib to Iroq,

             Qashqardan Tehrongacha,

Makkatillodan toki

               farangu olmongacha.

Temur bobo qulochin

             keng yoyganday bu ochun –

Termizdan Tabrizgacha,

             Ko'nyodan to Chin-Mochin.

Enasoy bo'ylariyu

             Oltoyu ham Sibirdan,

Qizilqum cho'llariyu

             ham Sahroyi Kabirdan.

Issiqko'l, Boyko'llarning

                   suvlariga yuz chayib,

Bahrayn to'lqinlariga

             tanga-tillo so'z chayib,

Yo'l yursa ham mo'l yurib,

             roppa-rosa to'qson yil,

Kezib manzil-bamanzil,

             kirib ko'ngilma-ko'ngil –

Goh afg'on bobo bo'lib,

             goh bo'lib arab bobo,

To'qson yoshga kiribsiz,

             Zokirjon Mashrab bobo.

Nogahon Bobur Mirzo

             paydo bo'lsaydi agar,

Avval shoirona, so'ng

             shohona tashlab nazar,

Bir sayr etib kelgan so'ng

                  Andijon gulzorini,

Sizga bergaydi shaksiz

               o'z bedov tulporini.

Ul zotning umri jangu

               jadallarda kechmishdir,

Sizning oy-yillaringiz

               safarlarda kechmishdir.

Har maqbara, har aziz

               mozorni obod aylab,

Lutfiy, Navoiylarning

               ruhlarini shod aylab.

Siz tavof etgan ne-ne

               azizu avliyolar

Izingizdan yo'llamish

               durudlaru duolar.

Siz topib ko'zga surtgan

             qo'lyozmalar qa'ridan

Ali Yazdiy bobolar

           boqar ming yil naridan.

– Mehmonlar, – deysiz, – Bog'i

               Boburni ham ko'ringlar…

Bunda tinmagay mangu

                 gangur-gungur gurunglar.

Eyji Mano janobning

                 ming bir tavozusi bor,

Ko'ksida ko'ngil degan

               nozik tarozusi bor.

Nizomiyning zavqidan

                 ogoh navkarni ko'ring,

Ozarbayjondan kelgan

                 Ramiz Askarni ko'ring.

Mulki Eronu Ajam,

                 Ovro Osiyo shunda,

Turk ham Turkiyo shunda,

                 rus ham Rusiyo shunda.

Shundadir bor olamni

                 o'zbekcha o'ylatganlar,

Boburni olmoncha ham

                 yaponcha so'ylatganlar.

“Tarixi Rashidiy” bu,

                 manov – “Bobur qomusi”,

O'zbekning sultonlari –

                 o'zbekning or-nomusi.

Bog'ishamoldan mangu

                 shamollar esaverar,

Boburni eslaganlar –

               Sizni ham eslayverar.

Umr o'tdi deb, olamga

               qaraydirsiz umidvor,

Zamona qo'rg'oniday

               mustahkamsiz, ustuvor.

El-yurtga xizmat qilgan

               zotlarga sharaf, bobo,

Ko'ngilni cho'ktirmang hech,

               Zokirjon Mashrab bobo.

Yuz yillarcha naridan,

               yana yuz yil beridan,

Iqtibos aytsam agar

               ustozlarning she'ridan:

Bobur hazratlarining

             bitgan zo'r nasridaysiz,

Andijonning to'qsonga

             kirgan yo'lbarsidaysiz.

 

29.07.2022 y.

 

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

3 × 4 =