Тадбирли чол

Қадимги  замонда Хажжож деган ўта бир золим ҳукмдор бўлган экан. У элга зулм қилишда тенгсизлардан экан. Нимадир бўлибди-ю бир куни оддийгина кийиниб қишлоқларга чиқибди. Йўлда унга бир қари чол йўлиқибди.

— Хў-ўш, бобо, аҳволлар қалай?

— Жуда ёмон. Ҳаммамиз ўлардай оч, фақат тўлаймиз хирож, — дебди.

— Ҳукмдорингиз қандай одам, розимисизлар?

— Э, сўраб нима қиласан. Умуман рози эмасмиз. Ўта золим-ку.

Бу гапдан Хажжож ғазабланиб:

— Ҳой бобо, менинг кимлигимни биласанми ўзи, — дебди.

— Йўқ, кимсан?

— Ўша золим деганинг Хажжож мен бўламан!

Чол қараса иш пачава. Энди бирон нарса ўйлаб топиш керак.

— Сен ўзинг-чи, менинг кимлигимни биласанми? — дея бўш келмабди чол ўлгудай қўрқиб кетган бўлишига қарамай, ўзини пинагини бузмагандай кўрсатиб.

— Кимсан?

— Билмасанг билиб қўй. Мен шу қишлоқнинг машҳур девонаси бўламан. Ҳар кун шу маҳалда девоналигим тутиб, оғзимга келганини гапиравераман.

Хажжож чолнинг доно, устамонлигидан зумда жаҳлдан тушиб, қаҳ-қаҳ отиб кулиб юборибди. Сўнг:

— Девона бўлсанг ҳам мард экансан. Хажжожга ҳали ҳеч ким бундай гап айтмаганди, — дея унга ҳадя­лар берибди. Энг муҳими, халққа зулм қилишдан тийилиб, элга қайишадиган кўп хайрли ишларга бош бўлибди.

Азамат ХУДОЙБЕРГАН

Янгиликларни дўстларингизга улашинг

Fikr bildirish

Email manzilingiz chop etilmaydi. Majburiy bandlar * bilan belgilangan

five × four =