Мураббийларининг ишончини оқлаган Тахмина
Бундан тўққиз йил муқаддам самарқандлик ёш қизча Қозоғистоннинг Остона шаҳрида бўлиб ўтган бадиий гимнастика бўйича “Айголек − 2014” халқаро мусобақасида шоҳсупанинг юқори поғонасини эгаллагани анча шов-шув бўлган эди. Ўшанда дунёнинг турли мамлакатларидан 340 дан ортиқ ёш гимнастикачи қизлар қатнашган мусобақанинг кўпкураш баҳсларида олтин медални қўлга киритган Тахмина Икромова 11 ёшда эди.
Юртимизда болалар спортининг ривожланишига қаратилаётган алоҳида эътибор ўз мевасини берди. Тахмина Икромова кейинги йилларда ҳам мураббийлари ишончини оқлаб, қатор совринли ўринларни эгаллади. “FIG” жаҳон чемпионати серияларида яккалик бўйича финалда олтин медални қўлга киритган биринчи ўзбек бадиий гимнастикачиси деган фахрли номга сазовор бўлди.
2023 йил август ойида Испаниянинг Валенсия шаҳрида ўтказилган бадиий гимнастика бўйича жаҳон чемпионатида эса Тахмина Икромова Ўзбекистон делегацияси учун “Париж-2024” ёзги Олимпия ўйинларининг илк йўлланмасини қўлга киритди.
2023 йил октябрда Хитойда бўлиб ўтган Осиё ўйинларининг бадиий гимнастика бўйича яккалик баҳсларида Тахмина Икромова олтин медалга сазовор бўлди. Тахмина мусобақада 131.300 балл тўплади ва барча рақибларини орта қолдириб, шоҳсупанинг энг юқори поғонасидан жой олди.
Маълумки, “Париж-2024” ёзги Олимпия ўйинлари 2024 йил 26 июль – 11 август кунлари Парижда ўтказилиши белгиланган.
У.Хўжаниёзов.