Murabbiylarining ishonchini oqlagan Taxmina
Bundan to'qqiz yil muqaddam samarqandlik yosh qizcha Qozog'istonning Ostona shahrida bo'lib o'tgan badiiy gimnastika bo'yicha “Aygolek − 2014” xalqaro musobaqasida shohsupaning yuqori pog'onasini egallagani ancha shov-shuv bo'lgan edi. O'shanda dunyoning turli mamlakatlaridan 340 dan ortiq yosh gimnastikachi qizlar qatnashgan musobaqaning ko'pkurash bahslarida oltin medalni qo'lga kiritgan Taxmina Ikromova 11 yoshda edi.
Yurtimizda bolalar sportining rivojlanishiga qaratilayotgan alohida e'tibor o'z mevasini berdi. Taxmina Ikromova keyingi yillarda ham murabbiylari ishonchini oqlab, qator sovrinli o'rinlarni egalladi. “FIG” jahon chempionati seriyalarida yakkalik bo'yicha finalda oltin medalni qo'lga kiritgan birinchi o'zbek badiiy gimnastikachisi degan faxrli nomga sazovor bo'ldi.
2023 yil avgust oyida Ispaniyaning Valensiya shahrida o'tkazilgan badiiy gimnastika bo'yicha jahon chempionatida esa Taxmina Ikromova O'zbekiston delegatsiyasi uchun “Parij-2024” yozgi Olimpiya o'yinlarining ilk yo'llanmasini qo'lga kiritdi.
2023 yil oktyabrda Xitoyda bo'lib o'tgan Osiyo o'yinlarining badiiy gimnastika bo'yicha yakkalik bahslarida Taxmina Ikromova oltin medalga sazovor bo'ldi. Taxmina musobaqada 131.300 ball to'pladi va barcha raqiblarini orta qoldirib, shohsupaning eng yuqori pog'onasidan joy oldi.
Ma'lumki, “Parij-2024” yozgi Olimpiya o'yinlari 2024 yil 26 iyul – 11 avgust kunlari Parijda o'tkazilishi belgilangan.
U.Xo'janiyozov.