O'zbek havo gimnastikachilari vengriyaliklarni hayratga solmoqda
Budapeshtning eng mashhur sirkida o'zbekistonlik havo gimnastikachilari Bekzod Sobirov va Bobur Toshpo'latovdan tashkil topgan “Duo Reflection” dueti chiqish qilmoqda.
O'zbek gimnastikachilarining har bir chiqishi yorqin va esda qolarligi bilan ajralib turibdi. Jamoa a'zolari akrobatika, gimnastika va milliy o'zbek sirk san'ati elementlarini o'zida mujassam etgan tomoshalarni namoyish etmoqda.
Mamlakatimiz gimnastikachilarining ishtiroki O'zbekiston va Vengriya xalqlari o'rtasidagi do'stlik rishtalarini mustahkamlashga qaratilgan xalqaro madaniy almashinuv dasturining bir qismi bo'ldi. Tadbir ko'plab tomoshabinlarga, jumladan, diplomatik korpus vakillari, madaniyat xodimlari hamda Vengriya poytaxti aholisi va mehmonlarida katta taassurot qoldirdi.
Shuningdek, O'zbekiston vakillari namoyish etgan yorqin sahna ko'rinishlari, akrobatik harakatlar va yuqori artistlik mahorati tomoshabinlar tomonidan iliq kutib olindi. Ayniqsa, akrobatik halqalar yordamida amalga oshirilgan mashqlar sirk san'ati muxlislarining hayratiga sabab bo'ldi.
Jamoa a'zolari bilan kechgan uchrashuvda o'zbekistonlik sirk san'ati ustalari Vengriyaga tashrifi haqidagi taassurotlari bilan o'rtoqlashdilar hamda samimiy qabul uchun minnatdorlik bildirdilar.
O'z navbatida, Budapesht sirki vakillari, o'zbek gimnastikachilarining yuqori tayyorgarligini ta'kidlagan holda, madaniy almashuv doirasidagi hamkorlikni yanada kengaytirishga umid bildirdi.
Shu o'rinda ta'kidlash kerakki, mazkur tadbir O'zbekiston va Vengriya o'rtasidagi madaniy aloqalarni mustahkamlash hamda milliy sirk san'atining rang-barangligini namoyon etishda muhim qadam bo'ldi. Shuningdek, bu o'zbek madaniyatini Yevropada yanada ommalashtirish, xalqlarimiz o'rtasidagi do'stlik rishtalarini mustahkamlashga ham xizmat qiladi.
“Guruhimizning nomi “Duo reflection” bo'lib, biz Budapesht shahrida O'zbekiston sirk san'ati imkoniyatlarini taqdim etyapmiz. Vengriyalik tomoshabinlar chiqishlarimizni olqishlar bilan kutib olgani bizga madad bo'ldi. Shuningdek, biz bilan birga Belgiya, Rossiya, Ukraina, Latviya, Fransiya, Efiopiya kabi davlatlardan kelgan sirk san'ati artistlari ham o'z mahoratlarini namoyish etmoqda. Yevropa Ittifoqi sirk arenasida O'zbekiston sharafini himoya qilayotganimizdan juda mamnunmiz”, dedi Bekzod Sobirov.
“Dunyo” AA