Muallim

Abdulla ORIPOV,

O'zbekiston Qahramoni, O'zbekiston xalq shoiri.

Muallim haqida so'zim ushbudir:

Muallim kamolot ichra ko'zgudir.

O'qidim Gerodot, tarixni ko'p bor,

Forobiy, Danteni takror va takror.

Barini o'qidim, lol qoldi aqlim,

Bariga ustozsan o'zing, muallim.

Alisher qalbiga solgan sehr-fayz

Sensan, ey muallim, ustoz Abul-Lays.

Qutlug' xonadonda qutlug' kalom bu,

Hamid Olimjon bu, G'afur G'ulom bu.

Buyuk Temur sendan topgandir ta'lim,

Sen shundoq aziz zot, aziz muallim.

Rost aytsam, o'zingsan eng avval daho,

Sen hayot ganjida durri bebaho.

Ulug' ayyomingda she'riy kalom bu,

Shogirdlar nomidan qutlug' salom bu.