Болажонларга қандай мультфильмлар қўйилмоқда?

…Назаримда, бу мультфильм болаларни қайсарликка ўргатиб, хархаша орқали шу заҳоти фикрини ўтказишга ундайдигандек. Руҳиятига ҳам салбий таъсир кўрсатиб, жиззакилик, жаҳлдорлик иллатларини сингдираётгандек.

Шу сабаб мультфильм танлашда эътиборлироқ бўлган маъқул…

Болалик — ҳаётнинг энг ширин даври. Уни ҳамма турлича бошдан кечиради. Ёшликдан ҳамманинг ўзи ёқтирган китоби, эртаги, таоми ва шу қаторда ўзи севган мультфильми бўлади. Мен “Симба”ни жуда мириқиб томоша қилардим.

Ҳозир ҳам мабодо телевизор экранларида ўша мультфильм кўриниб қолса, қизим ва ўғлим билан қўшилишиб кўрамиз. Ундаги воқеалар жуда қизиқарли ишланган. Кейин “Том ва Жерри”, “Денгиз итлари”, “Қундуз амакининг эртаклари”ни кўрардик. Менимча, айни вақтда ҳам булар ўз мухлисларига эга. Аммо ҳозир булар негадир теледастурларга киритилмаяпти. Эндиликда уларнинг ўрнини тез-тез экранларга узатиладиган “Маша ва Маймоқ” эгаллади. Кичик ёшдаги болани тинчлантириш учун ота-оналар телефон ёки телевизорда айнан шу мультфильмни қўйиб беришмоқда. Эътибор берганмисиз, бош қаҳрамон қизчанинг хатти-ҳаракатлари, қилиқлари бир қарашда болаликнинг бир шўхлигидек туйилса-да, у болажонларга қандай таъсир кўрсатмоқда? Назаримда, бу мультфильм болаларни қайсарликка ўргатиб, хархаша орқали шу заҳоти фикрини ўтказишга ундайдигандек. Руҳиятига ҳам салбий таъсир кўрсатиб, жиззакилик, жаҳлдорлик иллатларини сингдираётгандек.

Шу сабаб мультфильм танлашда эътиборлироқ бўлган маъқул. Унинг ўрнига “Бек ва Лола”ни тавсия қилиш менимча маъқулроқ. Ҳозирда кўп сонли мухлисларини топиб улгурган, “Youtube” орқали кўрсатиладиган “Бек ва Лола” 113 миллиондан ортиқ обуначиларига эга.

Бу эзгу лойиҳа Президентимиз ташаббуси билан Ёшлар ишлари агентлиги ҳомийлигида ўтган йили ёзда ишлаб чиқилган. “Бек ва Лола” миллий қадриятларни тарғиб қилишга, болаларга таълим-тарбия беришга ва одоб-ахлоқ қоидаларини ўргатишга қаратилган. Ҳозирда мультфильмнинг “Эрталабки бадантарбия”, “Шаклларни ўрганамиз”, “Бекинмачоқ” каби қисмларини томоша қилган жажжи болажонларимда яна кўрсам деган иштиёқ уйғонмоқда.

Шу кунларда ушбу мультфильм мактабгача таълим муассасаларида ҳам тарғиб қилинмоқда. Мурғак қалбларга тез таъсир қиладиган ҳаракатларни улар Бек ва Лола билан биргаликда бажаришмоқда.

“Дастёрлар” қисмини бир кўринг-а, сиз ҳам ёқтириб қоласиз. Бунда Бек ва Лоланинг ота-онасига уй юмушларида дастёрлик қилаётган саҳналари тасвирланган. Шу қисми тўрт ёшли қизим Мубинага ҳам ижобий таъсир кўрсатди. Уй ишларида ойисининг ёрдамчисига айланган.

Таклифим: “Бек ва Лола” каби лойиҳалар янада кўпайтирилса, телевидение орқали мамлакатимизнинг барча болажонларига намойиш этилса, шунда келажак авлод эгалари зукко, доно, меҳрибон бўлиб улғайишлари шубҳасиз.

Беғубор болаларга энг яхши нарсаларни илинайлик. Болаларнинг болалигини асрайлик!

Муҳаммадсодиқ ТЎРАЕВ