Bahor keldi, azizim!

Tog'lar boshiga boqdim, oppoq-oppoq orzular,

Osmonga qaragandim, moviy-moviy tuyg'ular,

Soylarda baxt tovushi — qiqir-qiqir kulgular,

Bahor keldi, azizim,

Bahor keldi, azizim!

Baxtim kulib mening ham bir juft qora ko'z topdim,

Qaro ko'zlar qa'ridan oydin-oydin so'z topdim,

Gahi kimxob topdim man, gahi parcha bo'z topdim,

Bahor keldi, azizim,

Bahor keldi, azizim!

Tomirlarda gupurib alvon-alvon gul oqdi,

Oy oydin yuzdan boqdi, kun kunday ko'zdan boqdi,

Bug'doyzor adirlarim yam-yashil gulxan yoqdi,

Bahor keldi, azizim,

Bahor keldi, azizim!

Onajon, sumalakdek rizqu ro'z — tansiq so'zing,

Otajon, boboquyosh taftidek issiq so'zing,

Ko'nglim, olamni tutsin gullarga oshiq so'zing,

Bahor keldi, azizim,

Bahor keldi, azizim!

Uyg'onish ayyomidan tan ichra jon ham yangi,

Muhabbat va sadoqat, his-hayajon ham yangi,

Borliq-tabiat yangi, ko'hna jahon ham yangi,

Bahor keldi, azizim,

Bahor keldi, azizim!

G'ayrat MAJID