U-17 Осиё чемпионати: Ўзбеклар ўзлигини кўрсатди

Баҳс нафақат майдондаги ўйинчилар, томошабинлар учун ҳам осон кечмади. Бу спорт, лекин Ватан ва Халқ обрўсини юксакка кўтариш, ўз юртини дунёга кўз-кўз қилиш, бўй-бастини янада кўрсатиб қўйиш учун чинакам баҳс эди. Назаримда, катта спортнинг довруғи шундаки, Ватан номи билан майдонга чиқилади. Стадиондаги ҳар бир футболчи Ватанга, ундан илҳақ бўлиб зафар кутаётган Халққа айланади.

Энг ҳаяжонли драматик ўйинни кузатиш мухлис юрагига нечоғлиқ ҳаяжон ва изтироб солишини футбол ишқибозлари бир неча бор ҳис қилишган. Бу галги ўйин эса бошқача кечди. Биринчи тайм сўнгги дақиқаларида иккита ўйинчимизга “қизил” кўрсатилди. Бизникилар тўққиз нафар қолди. Ўзганинг майдонида, рақиб мухлислари билан деярли лиқ тўлган стадионда, қаршилик босими томошабинлар томонидан ҳам, мезбон жамоанинг ўзи тарафдан ҳам кучли таъсир қилаётган бир пайтда, сафдошлари камайиб қолганига қарамай, ўзини ўнглаб олган ўзбек ўғлонларининг дадил тўп суриши менга худди парвоздаги бургутлар шиддатидай туюлди. Ўйиннинг ҳаёт-мамот палласида икки абжир жамоадошидан ажралиб турган ўғлонларимизнинг довдираб қолмагани, лаҳзада ўзларини ўнглаб мақсад сари отилиши, албатта, рақиб жамоани ҳам ташвишлантириб қўйди. Ботинида ғалабага иштиёқи баланд, бутун борлиғи билан зафар сари интилган йигитларимиз руҳан синмади. Бирдамлик ва бир диллик туйғуси билан боғланган футболчиларимиз тарихий ғалабани қўлга киритишди. Ўзбекистон ёшлари футболда чиннакам жасорат кўрсатишди ва тарихий ғалаба муаллифи сифатида футбол китобининг олтин варағига бу йил ўз номи — Ўзбекистон номини муҳрладилар. Финалда Ўзбекистон ўсмирлар терма жамоаси Саудия Арабистони жамоасини 2:0 ҳисобида мағлуб этиб, қитъа чемпионлигини қўлга киритди.

Футбол бу спорт, албатта, лекин айрим лаҳзаларда унинг замирида халқлар ва миллатлар қалбини зирқиратадиган ё чексиз шодиёна ҳислари билан аланга олдирадиган бир сирли куч борки, кечаги ўйинда ана шу куч таъсирини барча ўзбекистонликлар ботинан ҳис қилдилар. Барча ўзбекистонлик мухлислар гўё футболчиларимиз билан бирга араблар майдонида тўп суришди. Очиғи, миллат бирлиги ва бир диллиги намоён бўлди. Бундай пайтда кўзинг экранга қадалиши мумкин, лекин қалбинг, борлиғинг ўз жамоанг билан бирга бўлади. Ҳа, шу ўйинда бутун Ўзбекистон ўғлонларимиз ёнида эди… Майдондан чиқариб юборилган икки ўйинчимизнинг ўрнини чинакам мухлислар, деярли барча ўзбекистонликларнинг умид ва ишончи тўлдириб турди, деб ўйлайман. Мен мана шундай меҳр ва бирдамликни туйдим! Бироқ футбол тарихида эса энг драматик ва қатъиятли ўйинлардан бири сифатида эътироф этилиши ҳам шубҳасиз. Шундай экан, финалдаги ғалабамиз ҳам чин маънода тарихийдир!

Бу улкан тарихий ғалаба ўзбекнинг неларга қодирлигини дунёга намоён этди. Бу Янги Ўзбекистонни яна бир бор жаҳонга танитди.

Куни кеча Ўзбекистон Республикаси Президентининг “Футбол бўйича 17 ёшгача бўлган ўсмирлар ўртасидаги Осиё кубоги ўйинлари ғолиблари ва иштирокчиларини мукофотлаш тўғрисида”ги Фармони эълон қилинди.

Президентимизнинг 17 ёшгача бўлган Ўзбекистон терма жамоаси аъзоларига табриги йўлланди. Унда Юртбошимизнинг “Азиз фарзандларим!” дея меҳр кўрсатганлиги бутун халқимизни янада ғурурлантириб юборди.

Музаффар спортчиларимиз, уларнинг мураббийлари Ватанимиз остонаси — аэропортда кўтаринки руҳда кутиб олинди. Сўнг уларга давлатимиз, ҳукуматимизнинг юксак мукофотлари тантанали равишда топширилди.

Буларнинг барини ҳаммамиз кўрдик, гувоҳи бўлдик, суюндик.

Беихтиёр юракдан қуйидаги сўзлар шеър бўлиб, сатрларга жо бўлиб қоғозга тушди:

ҒАЛАБА МУБОРАК!

Алининг майдони… Мардлар ўйини —

Футбол ҳалолликни севади, укам!

Руҳингни туширма, бош ҳакам, майли,

Рақибингнинг яқин дўсти бўлса ҳам!

Ҳовучимда юрак, бўғзимда нафас…

Илтижом, ўт олсин кўксингдаги ор!

Жон болам, жон укам, бўш келма бирпас…

Дарвоза ортида Ўзбекистон бор!

Сафингиз камайди. Афсус… Чекма ғам —

Тўққиз алп шахтида сўнмаса бас ўт.

Парвозда қаноти шикаст еса ҳам,

Чўққига етгунча учади Бургут.

Бу дунё зўрники. Ортда қолма, ўз!

Томирингда ғолиблик шахти ила қалқ!

Қара, қандай шараф! Сенга тикар кўз

Ғалабангга интиқ ўзбек деган Халқ!

Юртнинг тузи ҳаққи Сен ютдинг ҳалол!

Ғолиблик шавқидан титрайди юрак.

Жасорат рамзисан, топмагин завол,

Ватан номин тутган зафар муборак!

Матонат синмагай куч берса ўзлик,

Ҳар жойда мардлик нақд… Ғирром насия.

Шоҳсупангга оёқ қўймоқда Ўзбек,

Сени ҳам қутлайман, бугун Осиё!

Қўчқор НОРҚОБИЛ