Онам дуолари қўллаб…
Юнус БЎРОНОВ,
“Янги Ўзбекистон” газетаси бўлим муҳаррири,
“Олтин қалам” Миллий мукофоти учун XIX халқаро танловининг “Энг яхши журналистик материал учун” (босма нашрлар) бўйича биринчи ўрин соҳиби:
— Кеч бўлганда Журналистлар уюшмасидан қўнғироқ қилиб, эртага “Ўзбекистон” анжуманлар саройига келишим лозимлигини, мен учун яхши янгилик борлигини сирли оҳангда айтишганида, гапнинг очиғи, бошқача бўлиб кетдим. “Наҳотки менинг ҳам камтарона ижодимни журналистлар ўртасида ўтказиладиган нуфузли мукофот – “Олтин қалам” мукофотига муносиб кўришган бўлса?!” деган савол, ширин бир мужда ўтди кўнглимдан. Бунга ишонишим қийин эди. Алланечук бўлиб кетдим. Жуда хурсанд бўлдим.
Бу янгиликни эшитиб, биринчи қишлоққа – онамга телефон қилдим. Бу ютуғимни, қувончимни онам билан бўлишгим, волидамни хурсанд қилишни чин дилдан истадим. Ахир ҳар бир инсоннинг ютуғидан она каби кўнгилдан севинадиган, ўзингдан-да кўпроқ қувонадиган ОДАМ бўлмаса керак.
— Мукофотланишингни телевизордан кўрсатишадими, болам? — деб сўради волидам.
Ишончим комил, онажоним кеча барча ишларини йиғиштириб қўйиб, кун бўйи телевизор қаршисида ўтирган бўлса керак.
Она, сизга ўғлингизнинг “Олтин қалам” мукофоти муборак бўлсин! Бу сизнинг заҳматли меҳнатларингиз самараси! Барчаси учун сизга қуллуқ, она. Сизнинг дуоларингиз сабаб бошим баланд, Яратганга шукрки, омад ҳам келиб турибди.
Фурсатдан фойдаланиб, танлов ҳакамлар ҳайъатига, барча устозларимга ўзимнинг самимий миннатдорчилигимни билдираман. Бу рағбат келгусидаги ижодий фаолиятимга янги куч, ғайрат бериши шубҳасиз.
Президентимизнинг, ҳукуматимизнинг ижод аҳлига, матбуот аҳлига эътиборидан мамнунмиз.