“Bugun Navoiy tug'ildi!”
Abdulla Oripov:
“Men ham erta tongda kasalxona derazalarini ochib yuboraman va butun borliqqa beixtiyor izhori dil qila boshlayman:
— Bugun Navoiy tug'ildi!”
Hanifa aya xotiralaridan:
“2013 yilning qish faslini Istanbulda o'tkazdik. 9 fevral — Navoiy boboning tavallud topgan kunlarida Abdulla aka Turkiya davlati, Istanbul shahri “Samo” kasalxonasining jonlantirish bo'limida yotgandilar. “Bu yil Navoiyning tug'ilgan kunida qatnasha olmayapman” deb juda bezovta bo'ldilar. 1968 yil “Navoiy” she'rini yozganlari hamon kechagidek esimda, biz Chilonzor tumanida istiqomat qilar edik.
Besh yuz yil unga ham nima gap axir,
Mingga qadam qo'ydi yigirma besh yosh, —
misralari bilan tugaydigan she'rlarining yozilish jarayoni. O'sha yillardan beri bizning xonadonimizda Navoiy bobomizning tavallud ayyomlarini albatta osh qilib nishonlardik. “Navoiy bobomiz juda nozikta'b, injiqqina bo'lganlar-da, biror marta ham shu kunda havo ochiq bo'lmaydi: yo qor, yoki yomg'ir yog'ib, izg'irin bo'ladi”, derdilar. Juda ko'p maqolalar yozganlar. Biror marta takror gap aytmas, albatta, biror-bir yangi tashbeh topar edilar.
Kasalxonada ham o'zlari osma ukolda yotgan bo'lsalar-da, menga shu maqolani aytib turib yozdirdilar. Yuz marta o'chirib, yuz marta ko'chirdim. Maqolaning qoralamasi tayyor bo'ldi. Nihoyat, palataga chiqdik. Ancha yaxshi bo'lib qoldilar. Kechasi bilan maqolani qayta-qayta ishladilar. Ilhomjon kasalxonaning kompyuterida bir necha martalab ko'chirib chiqdi…
Abdulla Oripov:
O'zbekiston Yozuvchilar uyushmasiga!
Hurmatli rais!
Mening olisdan yuborayotgan ushbu maktubimni navoiyxonlik kunlarida barchaga o'qib eshittirishingizni so'rayman.
Hazratning tavallud kunlarini xorij safarida nishonlashimga to'g'ri keldi. Zero, buning hech bir ajablanadigan joyi yo'q.
Navoiy jahon shoiridir va bo'lganda ham birinchisidir. Mening nazarimda, bu maqom Navoiy hazratlariga abadul abad berilgan. Men hamisha o'ylaganimni so'ylashga harakat qilib kelganman. Deymanki, xalqimizning qaysidir fazilati Parvardigori olamga yoqqan ekanki, o'z arshidan Navoiydek shoirni bizga tuhfa qilib yubormishdir.
Navoiy bobomiz o'zlarining bir xalqqagina emas, jami turkiy elatlarga, ahli dunyoga mansubligini yaxshi bilganlar.
Agar bir qavm,
Gar yuz, yo'qsa mingdur.
Muayyan turk ulusi
Xud meningdur.
Alisher Navoiy nomini eshitgandayoq qalbimiz quvonch va iftixorga to'lib ketadi. Inchunin, u zotning tug'ilgan kunlarida bu iftixorning adog'i bo'lmas.
Men ham erta tongda kasalxona derazalarini ochib yuboraman va butun borliqqa beixtiyor izhori dil qila boshlayman:
— Bugun Navoiy tug'ildi!
Abdulla ORIPOV,
O'zbekiston Qahramoni,
Xalq shoiri.
Fevral, 2014 yil. Istanbul.
(Ushbu bitik matbuotda ilk bor e'lon qilinmoqda)