“Atirgul” – ayol jurnalistlar ijodining e'tirofi
O'zbekiston Jurnalistlar uyushmasi tashabbusi bilan Oila va xotin-qizlar qo'mitasi hamkorligida xotin-qiz jurnalistlar o'rtasida o'tkazilgan “Atirgul” ko'rik-tanlovi g'oliblarini taqdirlash marosimi bo'lib o'tdi.
Mazkur tanlov jurnalistika sohasida faoliyat yuritayotgan xotin-qizlarning kasbiy mahorati, ijodiy izlanishlari va jamiyat hayotidagi faol ishtirokini qo'llab-quvvatlashga qaratilgan.
Alohida ta'kidlash joizki, ushbu ko'rik-tanlov so'nggi yillarda turli sabablarga ko'ra o'tkazilmayotgan edi. O'zbekiston Jurnalistlar uyushmasining sa'y-harakati bilan uning qayta tiklangani mamlakatimiz ijodkorlarini mamnun etdi.
Tadbir doirasida “Atirgul” tanlovining 12 ta nominatsiyasi bo'yicha g'oliblar tantanali ravishda taqdirlandi.
Jurnalist ayollarning turli janr va yo'nalishlardagi ijodiy ishlari nufuzli hakamlar hay'ati tomonidan baholanib, mazmuni, dolzarbligi, kasbiy mahorati hamda o'ziga xos yondashuvi bilan ajralib turgan ijod namunalari munosib e'tirof etildi.
Marosimning yana bir muhim jihati shunda bo'ldiki, O'zbekiston Jurnalistlar uyushmasi safiga yangi qabul qilingan 25 nafar xotin-qiz jurnalistga a'zolik guvohnomalari ham tantanali ravishda topshirildi. Bu esa ijodkorlar safi kengayib, ularda kasbiy birdamlik va hamkorlikka intilish tobora ortib borayotganidan dalolat beradi.
Bugungi kunda jurnalistika tezkorlik, chuqur tahlil, zamonaviy texnologiyalar va yangicha ijodiy qarashni talab etmoqda. Bu jarayonda xotin-qiz jurnalistlarning o'ziga xos nigohi, ijtimoiy masalalarni yoritishdagi faolligi hamda salohiyati alohida ahamiyat kasb etadi.
“Atirgul” ko'rik-tanlovi ana shu salohiyatni yuzaga chiqarish, jurnalist ayollar mehnatini munosib baholash, ularning ilg'or tajribasini ommalashtirish va yangi ijodiy loyihalarga yo'l ochishga xizmat qiladi.
Tanlov nafaqat g'oliblarni aniqlash, ularni moddiy hamda ma'naviy jihatdan qo'llab-quvvatlash, balki soha xodimalarini birlashtirish, o'zaro tajriba almashish va yangi imkoniyatlarni yaratish nuqtai nazaridan ham muhimdir.
Zero, jamiyatdagi muhim jarayonlarni xolis va ta'sirchan yoritib kelayotgan ayol jurnalistlarning mehnati, izlanishi va fidoyiligini e'tirof etish — milliy jurnalistika taraqqiyotiga berilgan munosib bahodir.
Tanlov g'oliblari ham bugungi e'tirof ularga yangi marralarni zabt etishda muhim rag'bat bo'lganini bildirdilar.
— “Atirgul” ko'rik-tanlovining qayta tiklangani yurtimizda amalga oshirilayotgan islohotlarning hayotdagi yorqin ifodasi, xotin-qizlar huquqlari ta'minlanayotgani, fuqarolik jamiyati faollashayotgani hamda ayol jurnalistlar davlat tomonidan qo'llab-quvvatlanayotganining yaqqol dalilidir, — dedi g'oliblardan biri, “Vesti Karakalpakstana” gazetasining maxsus muxbiri Halima Xalilayeva. — Nashrimiz 100 yillik tarixga ega. Bugun ustozlar ishini davom ettiryapmiz. Asosan, xotin-qizlar mavzusida qalam tebrataman. Mazkur respublika tanlovida muvaffaqiyat qozongan barcha kasbdoshlarimga ulkan ijodiy zafarlar tilayman.
— Olis qishloqdan kelib, matbuotda, ayniqsa, ayollar uchun kamyob sanalgan fotojurnalistika yo'nalishida e'tirofga sazovor bo'lganim va “Atirgul” mukofotini qo'lga kiritganimdan behad xursandman, — dedi “Yoshlar ovozi” gazetasi muxbiri, nufuzli tanlovning “Eng yaxshi fotojurnalistik ish” nominatsiyasi g'olibi Xolida Musurmonova. — Fotojurnalistika — sohaning eng murakkab tarmoqlaridan biri. Ko'p yillardan buyon ushbu yo'nalishda izlanib kelmoqdaman, bugun mehnatim qadrlanib, mana shunday mukofotga ega chiqqanimdan faxrlanaman.
Darhaqiqat, “Atirgul” — ayol jurnalistlarning iste'dodi, jasorati, mahorati va tinimsiz izlanishlariga berilgan munosib e'tirofdir!
O'zbekiston Jurnalistlar uyushmasi
Axborot xizmati.