Daraxt shoxidagi so'nggi barg misoli…
Murodxon NIYoZXONIY
Muallif haqida:
Murodxon NIYoZXONIY — 1960 yilda Ishtixon tumanining Shayxlar qishlog'ida tug'ilgan. “Salom, bu – men” nomli kitobi nashr etilgan.
She'rlari, tarjimalari va maqolalari vaqtli matbuot sahifalarida e'lon qilinib turiladi.
“Do'stlik” ordeni bilan taqdirlangan.
ONAMGA MAKTUB
Savolingiz qo'ydi meni shoshirib,
“Falonchi qizini sevarmiding sen?”
Nima ham qilardim asli yashirib,
“Yo'q”, dedim, “yo'q” dedim,
soxta kuldim men.
“Nega aytmading?” deb qiynamang meni.
Tola sochingizga arzimas dardim.
Onajon, dardingiz oshirib emas,
Baxtingiz oshirib yashash – istagim.
Men mag'rur tug'ildim, mag'rur o'laman,
Sevgiga ham egmay bu qaysar boshni.
Lekin men tiz cho'kib o'pa olaman
Oyog'ingiz tekkan har xasni, toshni.
Onajon, kuyinmang, shunday kun kelar,
O'g'lingizni shunda dunyo biladi.
O'sha, o'g'lingizga tegmagan qizlar
Hali juda qattiq afsus qiladi.
O'GIT
Do'stni “do'st ekan”, deb ko'tarma boshga.
Ushbu nasihatim angla, ol uqib.
Og'rinma bugungi do'stlar safidan
Kimdir chiqsa erta, bo'lib zo'r raqib.
Raqibni “raqib” deb kaltaklama ko'p.
Tanti yigit uchun, bilgil, bu ordir.
Kim bilar bugungi raqiblar ichra
Ertangi eng sodiq do'stlaring bordir.
KUZ
Qulog'imni teshguday bo'ldi
Xiyobonda, oyoq ostidan
Eshitilgan o'tkir chinqiriq
Va … tanidim sarg'aygan bargni!
Gunohga botirding meni, Kuz,
Oyoq bosdim yashilligida
O'zim sevgan bargning yuziga.
Gunohga botirding meni, Kuz…
YaNA KUZ
Kuz,
Mening rafiqamga o'xshaysan.
Sochlari – oltin,
Yuzlarida oftob kulguvchi.
Kuz,
Yoz bo'yi qo'shiqlar kuylab,
Qish oldidan yalang'och qolgan
Daraxtlaring menga o'xshaydi…
* * *
Oxirgi ilinjim
Daraxt shoxidagi
So'nggi barg misol
Titrab turar
Yuragim bir burjida…
Sen chiqmading.
“Xayr!” deganday bo'ldi
Ohista birov.
Yetim ilinj –
Uzilgan shul barg
Yerga boshin qo'ygunicha to
Sochlarimni qopladi qirov…
QIShLOQ
Qishloq yaxshi,
Ko'z yumsang unda,
Eshitganlar yo'lidan keladi qaytib.
Qarindoshmi, begonami
Kelib yig'laydi,
Hech bo'lmasa … o'z dardin aytib.
Kun kelar,
Meni sevishingni odamlar bilar
Va olam havasi keladi menga.
G'iybat botqog'ida qurbaqa o'lar.
Shuncha yil yashadim, ishonib shunga.
Kun kelar,
O'larman, ko'z yoshing – daryo,
Kuyinib yig'laysan ajalni qarg'ab.
Menga havas qilar yana bu dunyo,
Men uchun sen to'kkan ko'z yoshga qarab!