Men nima uchun “Hurriyat”ni o'qiyman?
“Dilga yaqin, elga yaqin”, degan gap bejiz aytilmagan. Har bir inson ko'ngliga, diliga mos va xos narsaga intiladi. O'quvchi sifatida har bir insonning o'z ta'bi va mayli bo'ladi. Odatim shunaqa, oldi-qochdi, uzuq-yuluq, balandparvoz gaplarni yoqtirmayman. Shu boisdan, gazeta va jurnallarni saralab o'qiyman. “Hurriyat” o'quvchini befarq qoldirmaydigan, mulohazaga undaydigan maqolalari bilan o'qishli. Ayniqsa, tanqidiy, tahliliy maqolalardagi dangallik, ro'y-rostlik o'quvchida bugungi ma'naviy hayotga bo'lgan tashnalikni qondira oladi.
Gazeta sahifalaridagi buyuk allomalar, taniqli insonlar hayoti va faoliyatiga oid maqolalarni ham qoldirmay o'qib boraman. Chunki ularning hayot yo'li yoshlar uchun ibrat maktabidir. Zero, milliy ma'naviyatimiz, madaniyatimiz, boqiy qadriyatlarimiz va tafakkurimizning teran ildizlari ulug' bobokalonlarimiz yozib qoldirgan boy ilmiy, madaniy va ma'naviy merosdan bahra oladi. Shu jihatdan ham bu gazeta respublikamizda o'z o'rni va mavqeiga ega. Ishonaman, o'zini ziyoli, deb bilgan odam “Hurriyat”ning har bir sonini intiqlik bilan kutadi.
Kasbim bilan bog'liq kundalik ishlarimni saranjomlagach, albatta, stolim ustidagi o'zim obuna bo'lgan gazeta va jurnallarni varaqlayman. Ularning orasida “Hurriyat” taxlamlari tepada turadi. Mutolaa baravarida ma'naviy hordiq olaman, charchog'imni chiqaraman, tafakkurimni charxlayman.
“Hurriyat”chilar bundan keyin ham odamlarning dilidagi mavzularni, elimizning istiqboliga xizmat qiladigan bahstalab hamda munozarali materiallarni o'z sahifalarida muhrlab boraversin.
Yana bir gap. Biz shifokorlar bemor sog'ayishi uchun, dardiga malham topish uchun kurashamiz. Lekin matbuot ahlini ham “hamkasblarimiz” desam xato bo'lmasa kerak. Chunki jurnalistlar — jamiyatdagi dardni, illatlarni ilg'ay olishi, dadil ko'tarib chiqishi, “davosini” ayta olishi bilan jamiyat shifokorlaridirlar. Ana shunday dadil, o'tkir gazeta hisoblangan “Hurriyat” eng sevimli nashrlarimdan. Shu sababdan unga kelgusi yil uchun ham obuna bo'ldim.
Komil ABDUVOHIDOV,
Surxondaryo viloyati ko'p tarmoqli
tibbiyot markazi bosh vrachi,
oliy toifali shifokor.