Dil tubida ovozsiz faryod

Muallif haqida:

Muhayyo Rustam qizi – 1973 yilda Paxtachi tumanida tug'ilgan. Navoiy davlat pedagogika institutini tugatgan.

Navoiy viloyati teleradiokompaniyasi, viloyat “Do'stlik bayrog'i” gazetasi, “Yosh kuch”,   “G'uncha” jurnallari, Respublika yosh ijodkorlar kengashida ishlagan. Hozirda O'zLiDeP Navoiy viloyati kengashi axborot xizmati rahbari.

She'rlari Respublika va xorij matbuotida e'lon qilingan.

 

QORMALAK

To'zg'ib-to'zg'ib bo'ralaydi qor,

Oq ko'ylagin kiyadi shahar.

Ayol erin ishga kuzatib

Derazadan termular sahar.

 

Baland uylar,ettinchi qavat,

Qorday oppoq, harir kechalar…

U ayolning sochlari kabi

Oqaradi sokin ko'chalar.

 

Jilmayarkan ayol oynadan,

Er ham qara-ab qo'yar tepaga.

To'rt faslda adashmadi ishq,

To'rt faslda mehr enaga.

 

Tashqarida yog'ayotgan qor

Ikki dilning mayin izhori.

Musaffo tong oydin ko'ngilning

Otayotgan kumush nahori.

 

Qor tinmaydi… Ayozdan pana

Oppoq-oppoq bo'ralar xayol.

Bir otashin o'ylarga cho'mib

Derazada eriydi ayol.

         * * *

Barmoqlarim sochilib ketdi

rutubatli fasl qa'riga.

Men bahor deb o'ylabman qishni.

 

Niho-oyatda uzoq yanglishdim,

yorib kirib muz qatlamini

mahobatli ulkan kemaday.

 

Ortga yo'l yo'q, osmon ham bekik.

Axir sochim gulladi qiyg'os

Qoyalarga sanchildi umrim.

 

Faqat qushlar…

                   Qushlar bor ko'kda,

orziqtirar mudom xayollar.

Dil tubida ovozsiz faryod.

 

Yuragimdan ufurar afsus,

muhabbating abadiy muzlik.

Nega meni tanlading,nega?..

                * * *

Unutib qo'yibman ismimni,

Kim deb atalishim bilmayman.

So'nggi yillar kitobin titib

topolmadim hech qursa o'zimga tanish ismni.

Qancha yillar o'tdi.

Hech kim chaqirmadi,

hech kim chorlamadi

birov so'ramagan ismimni

bir umrga unutib qo'ydim.

Olis qishloqdagi

paxsa devor yonida

taxta o'tirg'ichda o'tirgan

bir chol va bir kampir yuragida qolib ketdi U…

                                * * *

Men senga yetmadim

O'zimdan ketib,

Yuragimga tushdi bir hovuch yog'du.

Ikki shahlo ko'zing yondi ko'zimda.

Senga yetmadim.

Ko'zlarimda yonding, men ko'zingda yo'q.

Senda yo'q ekanman, o'zimda ham yo'q.

U kech eng bedavo telbamu edim,

Sen meniki dedim, meniki dedim,

Senga yetmadim.

Ey, yor,

Ey, mening dilozor yorim,

Ey mening avvalim, mening oxirim.

Ruhimni samoga berdim,

Bag'rim tuproqda

O'z boshimga yetdim,

Senga yetmadim.

 

         OY SOHILI

  1. Ma'yus yolg'izlikka

                           Kuy chalar kecha,

Sukut to'lqinida

                           nur oqizar oy,

Ko'k qa'riga tortdi diqqatim.

 

  1. O-o,

       naqadar tubsiz zulmat bu…

Ko'zlarimni qaritdi jimlik,

Yuragimni yaladi vahshat.

 

  1. Men Osmonga

  bir tomib ko'rdim.

Osmon chuqur… Judayam chuqur.

  1. Sensiz qanday yashayin endi?..

Sensiz qanday yashayin endi?..

Biram sokin Oyning shu'lasi…

                * * *

Bu kech mening tushimga kirdi,

Osmondan uzilgan yulduzlar.

Munavvar tunlarni izladim.

Hansiraydi tegramda xotir,

Chayqalgancha xayol sathida

Uu-uvv, maston dilimni istadim.

Bolg'alaydi ruhimni dunyo,

Manglayimga g'am qoqar hayot.

Tog' yasadim qiyilgan jondan.

Qonab ketdi qorachig'larim,

Tun qa'rida majhul taxayyul.

Men og'i-ir havoga yo'liqdim.

 

TUNGI XIRGOYI

Ko'ksi yirtiq yulduzlar

yoqalarin yamaydi.

Bir qiz sochini shamol

Tili bilan yalaydi.

(Shomda ufq roshiga o'rnatinglar chimildiq…)

Itlar hurar betinim,

Manzilga chorlov shudek.

Hayajonda entikib

yigit kiyadi etik.

(Orolanar ko'kda Oy.)

Yuragi idrar qizning,

Soyga dumalatar tosh.

Ko'zidagi to'lqindan

yuzlariga tomar yosh.

(Shuncha olismi Osmon?.)

Ishqqa mubtalo yigit

barmog'ini to'g'raydi.

Qoni oqqan barmoqlar

qiz sochini so'raydi.

(Oyoq iz botmas Yerga…)

               * * *

Ko'zim g'amga to'ldi, ko'nglim qayg'uga,

Horg'in xotiramda so'ngsiz pushaymon.

Umr o'tib borar, to'ymay tuyg'uga

Va bil'aks baxt istar yuragim hamon.

Hamon parvoz etar ruhim qushlari,

Hamon tilagimning chegarasi yo'q.

Hamon ilhom qilar orzum tushlari,

Hamon hayotimda binafsha ko'k-tug'.

Yashil dunyolarni chertaman takror,

Tangrim, toleimning darichasin och.

Sezyapman, sevgiday kelmoqda bahor,

Har bitta barmog'i gullagan og'och.

                * * *

Xitoy chinnisiday

sofdir yuragim.

Uzluksiz jaranglar

bir marta chertsang…

Bodom gullarini

urganday sovuq

sanchilganda gardanimga

qismat tig'lari.

Zamharir yalagan idishlarimda

sovumadi sening nasibang.

Qaynoq munosabatimdan

aslo titrama.

Faqat ehtiyot bo'l

tushib ketmasin

kafting chizig'idan

mening siyratim.

Men gullari og'irlik qilgan

sopol guldon kabi

indamay

bo'linib qo'ya olmasman.

Xitoy chinnisiday

toza yuragim…

                     * * *

Kech kuz… Barglar to'kildi essiz,

Borliq uzra taxayyul hokim.

Yaproqlarni kuzatib unsiz

yomg'ir bo'lib yig'layapman jim.

Ana mezon uchar tentirab,

xayolimday kezadi nasim.

Hu-uv samoda parquday oppoq

bulutlarga kelar havasim.

Sariq dengiz xazon chayqalar,

miskin navo tebranadi bog'.

Orzularga qilichlar qadab

xo'shlashadi sokin tiyramoh.

Dilgir havo-men kabi mulzam,

quyosh ishqi bag'rini tilgan .

Balki baxtli bo'lardim men ham

uchi-ib ketsam turnalar bilan.

Kech kuz… Barglar to'kildi essiz…

                           * * *

Munis tuyg'ularni g'ijimlar ozor,

Qop-qora zulflarda qo'nim topdi qor,

Bu masrur dunyoda majruh muhabbat

Unutildi bahor, unutildi yor.

Ko'zimni berkitdim ko'z yoshim bilan,

Xiyonating yopdim bardoshim bilan,

So'ngsiz umr ko'rdim yosh boshim bilan

Unut bo'ldi bahor, unut bo'ldi yor.

Ey,sas ber,ovoz ber, ruhimning rozi,

Chorbog'imda mehmon gulning pardozi,

Dil chalsa boz ishqning takrorin, sozin

Uni tildi bahor, uni tildi yor.

 

Agar qayta olsang omondir bog'im,

Yuragim alamdan qotgan qadog'im.

Qo'rqma, qo'limdagi toshmas, sabog'im

Unutilgan bahor, unutilgan yor.

 

Hali oq olmaday gullagim kelar,

Umrimni iforga belagim kelar,

O'zimdan ham avval tilagim kelar

Unutmasa bahor, unutmasa yor.

 

Sening zaqqumingni ichdim abgorman,

Tanazzul bu hayot, menda dushvorman,

Toki maston husning, lutfingda borman

Meni unutma yor, unutma bahor.

 

MUSOFIR O'LAN

                     1

Samarqandda

       sakkiz yildan buyon,

issiq ko'rpasiga o'ranib

soch-soqoli qorday oqargan

oppoq otam bor mening.

Samarqandda

oq bulutday oppoq otamning

momiq ko'rpalarin qavigan

duolari quyoshday qaynoq,

iltijosi nur kabi zarrin,

mehri alangaga o'xshagan

kundayin nurafshon enam bor mening.

Samarqandda

o'sha oppoq otam bilan issiq enamning

taqdirini kuya yeb qo'ygan,

qismatiga bit oralagan

xolis xayol o'g'li

jabrdiyda padarim bor mening.

Samarqandda

hilpiragan bayroqchalar jon jigarlarim,

najib alifbolar yulduzchalarim,

ofatijon singlim, sho'x ukalarim —jajji mamlakatim bor mening.

Samarqandda…

                                2

Jaranglaydi xotira,

Potirlaydi xayolim,

Ko'kda zangori hilol.

Ko'zim uchdi juft turna,

Kiprigim qoqdi shamol.

Chayqalar keksa dengiz.

 

Muhayyo Rustam qizi

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

five × five =