Yangi O'zbekistonning yangi loyihalari

Oliy Majlis huzuridagi nodavlat notijorat tashkilotlari va fuqarolik   jamiyatining boshqa institutlarini qo'llab-quvvatlash jamoat fondi mablag'larini boshqarish bo'yicha Parlament komissiyasining navbatdagi yig'ilishi bo'lib o'tdi.

Yig'ilishda O'zbekiston Respublikasi Prezidentining Oliy Majlis palatalariga qilgan Murojaatnomasida va “Yoshlarni qo'llab-quvvatlash va aholi salomatligini mustahkamlash yili” davlat dasturida belgilangan vazifalarni amalga oshirish maqsadida NNT va fuqarolik jamiyati boshqa inctitutlarining muhim ijtimoiy ahamiyatga molik lo­yihalarini davlat ijtimoiy buyurtmasi hamda davlat grantlari shaklida qo'llab-quvvatlash bo'yicha o'tkazilgan 4 ta tanlovning natijalari ko'rib chiqildi.

Parlament komissiyasi tomonidan “Yoshlarni ma'naviy yetuk qilib tarbiyalashda hamda bandligini ta'minlashda ijtimoiy sheriklikni kuchaytirish” mavzusida 50 ta davlat granti loyihasini 2,0 mlrd. so'mga qo'llab-quvvatlash bo'yicha qaror qabul qilindi. Loyihalarni qo'llab-quvvatlash mamlakatimizda yoshlarni ma'naviy yetuk qilib tarbiyalashda hamda bandligini ta'minlashda ijtimoiy sheriklikni kuchaytirish, joylarda uyushmagan yoshlarni jamiyatga integratsiya qilishda ularning qiziqishi, xohish-istaklarini ro'yobga chiqarish, kasbga yo'naltirish va bo'sh vaqtlarini mazmunli tashkil etishga alohida e'tibor qaratildi.

Uchinchi Renessans g'oyasini yoshlar ongiga singdirish, yoshlarda madaniy merosga hurmat, milliy an'analarga e'tiqod, Vatanga muhabbat tuyg'ularini shakllantirish maqsadida “Kitobxonlar viktorinasi” va “Amir Temur buyuk sarkarda, ilm fan homiysi” mavzusida insholar tanlovini, “Ajdodlar merosi – ma'rifat ziyo­­si” nomli ilmiy-amaliy anjumanlar, millatlararo totuvlik va barqarorlikni ta'minlash, do'stlik, hamjihatlikni hamda tinchlik va totuvlikni yanada mustahkamlashga qaratilgan festivallar, forumlar, tanlovlar, uchrashuvlar va boshqa tadbirlar tashkil etish belgilandi.

Uyushmagan va kam ta'minlangan yoshlar o'rtasida kichik biznes va tadbirkorlik ko'nikmalarini berish bo'yicha mahorat darslari tashkil etiladi va ulardan qiziqishlariga qarab kasb egallashga yordam ko'rsatilishi ta'kidlandi.

“Jamiyatda sog'lom turmush tarzini targ'ib qilish va aholi sog'lig'ini mustahkamlashda fuqarolik jamiyati institutlarining faolligini oshirish” mavzusida moliyalashtirilayotgan grant loyihalari doirasida: tibbiy bilimlar, erta nikoh, erta tug'uruq, sog'lom turmush tarzini shakl­lantirish, to'g'ri ovqatlanish, turmush qurmagan yoshlarni oilaviy hayotga tayyorlash, jismoniy madaniyatni keng targ'ib qilish, birinchi yordam ko'rsatish, aholini tabiiy ofatlarga tayyorgarligi bo'yicha o'quv mashqlari, aksiyalar va boshqa tadbirlar tashkil etilishi ham aytildi. “Biz sog'lom turmush tarzi tarafdorimiz”, “Sog'lom oila yurt kelajagi”, “Terrorizm va giyohvandlikka qarshimiz”, “Oila — muqaddas dargoh” kabi mavzularda davra suhbatlari, uchrashuvlar, seminar va musobaqalarni tashkil etish uchun ham 50 ta davlat granti loyihasini 2,0 milliard so'mga qo'llab-quvvatlash bo'yicha qaror qabul qilindi.

 

O'zbekiston Respublikasi Mustaqilligining 30 yilligi munosabati bilan e'lon qilingan “Yangi O'zbekistonda erkin va farovon yashaylik!” g'oyasi asosida fuqarolik jamiyati institutlarining ma'naviy-ma'rifiy va targ'ibot-tashviqot bo'yicha 30 ta grant loyihalari, 1,5 milliard so'mga qo'llab-quvvatlandi.

 

Bu orqali “Ayollar”, “Yoshlar”, “Mehr” va “Temir” daftarlarga kiritilgan shaxslarning siyosiy-huquqiy, ijtimoiy-iqtisodiy, ma'naviy-ma'rifiy hayot darajasini yaxshilashga, yangi ish o'rinlari yaratishga, alohida ma'naviy uyg'oqlik va ijtimoiy mas'ullikka asoslangan yangicha dunyoqarashni shakllantirishga ko'maklashiladi.

 

Shuningdek, joylardagi muammolarni tizimli hal qilishda ijtimoiy sheriklik va jamoatchilik nazorati mexanizmlarini kuchaytirish, “Obod qish­loq”, “Obod mahalla”, “Yoshlar kelajagimiz”, “Har bir oila — tadbirkor” kabi dasturlar ijrosida fuqarolik jamiyati institutlarining tashabbus­larini qo'llab-quvvatlashga yo'naltiriladi.

 

Ekologiya atrof-muhit muhofazasi masalalarida jamoatchilik va fuqarolik jamiyati ins­titutlari bilan mustahkam hamkorlikni ta'minlash hamda korrupsiyaga oid xavf-xatarlar yuqori bo'lgan sohalarda huquqbuzarliklar sodir etilishining sabab va shart-sharoitlarini aniqlash, OAVni korrupsiyaga qarshi kurashish sohasiga keng jalb etish maqsadida 4 ta davlat ijtimoiy buyurtmasi 1,0 milliard so'mga moliyalashtirilishi belgilandi.

Parlament komissiyasi tomonidan “Millatlararo bag'rikenglik va do'stlik muhitini mus­tahkamlashda fuqarolik jamiyati institutlarini qo'llab-quvvatlash” mavzusida davlat granti ajratish bo'yicha 6-tanlovi e'lon qilindi. Tanlovni joriy yilning 25 noyabrdan 26 dekabrgacha e'lon qilish belgilandi. Parlament komissiyasi boshqa masalalarni ham ko'rib chiqdi va tegishli qarorlarni qabul qildi.

O'z muxbirimiz.

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

1 × three =