Shamollarga o'tmaydi so'zim

Rahim NAZARMAT

 

Muallif haqida:

Rahim Nazarmat (Nazarmatov) — 1949 yili Toshkent shahrida tug'ilgan.

Toshkent politexnika instituti (hozirgi Toshkent davlat texnika universiteti)ni tamomlagan. Texnika fanlari nomzodi. Bir qancha ilmiy maqolalar va monografiyalar muallifi. She'r­lari respub­lika matbuotida e'lon qilingan. Rahim Nazarmatov — taniqli o'zbek shoiri Nazarmatning farzandi.

 

 

                   SEVGI

 Balog'atga yetganda yoshing

Jo'sh urarkan tanangda qoning.

His tuyg'udan aylanib, boshing,

Kechalari qochsa xayoling,

Sevgi bunga sabab bo'larkan.

 

Har bir gulga mahliyo bo'lib,

Kapalakdek betartib uchib,

Barchasiga qo'nmoqchi bo'lib,

Oqibatda dovdirab qolsang,

Sevgi bunga sabab bo'larkan.

 

Bahor fasli mayin shaboda

Sochlaringni bir silab o'tsa

Qizlar qo'li kabi tuyulsa,

Yuraklaring gupirlab ketsa,

Sevgi bunga sabab bo'larkan.

 

Uzoqdagi yulduz shu'lasi,

Jilvalanib qalbing ilitsa,

To'lin oy ham sirdoshing bo'lib,

Sanamlardek go'zal ko'rinsa,

Sevgi bunga sabab bo'larkan.

 

Butun borliq, mo''jiza bo'lsa,

Har bir kuning ajoyib o'tsa.

Shirin hislar ergashib yursa,

Abadiydek yoshlik tuyulsa,

Sevgi bunga sabab bo'larkan.

 

                         * * *

Bahordagi yam-yashil barglar,

Sarg'ayibdi tilla rang bo'lib.

Kunlar emas, o'tibdi oylar,

Gilam bo'ldi, ular to'kilib.

 

Shamollarga o'tmaydi so'zim,

Aytolmayman to'zg'itma, — deya

Shu da'fada seni o'yladim,

Zavqlanardi u bo'lsaydi-ya.

 

Na ilojdir, fasl aylanar

Yana kelar, kuz bo'lgan damlar.

Poylaringa poyandoz bo'lar

Yaproqlardan bo'lgan gilamlar.

 

                   VATAN

Qanday so'zla ulug'lay seni

Tarifinga ojizdir tilim.

Onam desa bo'larmi joiz,

Muqaddassan mening Vatanim.

 

Egri-bugri chiziqlar bilan

Xaritada o'ralgan makon.

Bitta bizmas, boshqa yurtlar ham,

Shu yo'sinda ko'rinar jahon.

 

Quyosh boqar hammaga birday,

Almashadi kecha kunduzlar.

Koinotda bir hikmat borday,

Jilmayadi ko'kda yulduzlar.

 

Oydin qilar jahonni oy ham,

Bir to'lishib, bir kamon bo'lib.

Ming shaklga kirib bulutlar,

Suzishadi samoni kezib.

 

Yaratganda borliqni Olloh,

In'om bo'bdi bizga shu oshyon.

Dilda imon, go'zal xulq bilan,

Qad rostlabdi o'zbek degan nom.

 

 Har zarrangda mujassam tarix,

Har zarrangda avlodlar xoki.

Har zarrangda kelib ketganlar,

To'kilgandir kindigin qoni.

 

Tuprog'ingni o'payin Vatan,

Ko'zlarimga surtayin garding.

O'tgan zotlar bag'ringda Vatan,

Borlari-chi, joningda Vatan!