Kitoblar taqdimoti
O'zbekiston Jurnalistlar uyushmasi Qoraqalpog'iston bo'limi tomonidan Respublika axborot-resurs markazida A.Turekeevaning “Jurnalistika — mening hayotimda” va To'rtko'l tumani televideniesi rahbari M.Masharipovning “Qoraqalpog'im” nomli kitoblari taqdimoti o'tkazildi.
Tadbirda jurnalist P.Xojamuratova “Jurnalistika — mening hayotimda” kitobi haqida fikr-mulohazalarini bildirdi. Bu kitobda jurnalistning jamiyatda tutgan o'rni, uning fuqarolik pozitsiyasi xususida so'z yuritilgan.
M.Masharipovning “Qoraqalpog'im” essesi haqida jurnalist J.O'teniyazov kitobxonlarga kengroq ma'lumot berdi. Kitobda xalqlar do'stligi, Vatanga sadoqat, tug'ilgan yerga muhabbat, yurt o'g'lonlari va qizlarining g'ayrat-shijoati tarannum etilgan.
Taqdimot marosimi so'nggida kitobxonlar o'zlarini qiziqtirgan savollarga batafsil javob oldi. Eng yaxshi savol egalariga kitoblar sovg'a qilindi.
O'zbekiston
Jurnalistlar uyushmasi
Axborot xizmati