Shaxsiy daftarim hoshiyasidagi bitiklar

Yurtimizda O'zbekiston xalq yozuvchisi O'tkir Hoshimovning “Ikki eshik orasi”, “Tushda kechgan umrlar”, “Begona bahor”, “Dunyoning ishlari” kabi asarlarini o'qimagan yoki nomini eshitmagan insonni topish mushkul, menimcha. O'ylashimcha, ular orasida “Daftar hoshiyasidagi bitiklar”ning ham alohida o'rni bor. Quyida yozuvchining ushbu kitobini o'qigach, havas bilan yozib qo'yganlarimni e'tiboringizga taqdim etmoqdaman.

Bizga Nobel mukofoti uchun yozilgan asarlar emas – odamlar uchun yozilgan asarlar kerak. “Navoiy” romani, “O'tkan kunlar”, “Mehrobdan chayon”, hatto “Xamsa” va “Boburnoma” ham Nobel mukofotini olgani yo'q. Ammo odamlar sevib o'qishadi. Chunki bu asarlar Odamlar uchun yozilgan. Ularni tarbiyalash uchun yozilgan. Muhimi shu. Adabiyotning ham maqsadi — odob o'rgatish. Mukofot olish emas.

                             * * *

Qo'rquvning otasi – bilmaslik,

Onasi – bilishni istamaslik.

                            * * *

Yaxshi insonlar o'z yaxshiliklarini odamlarga ko'z-ko'z qilishmaydi. Balki shu boisdir ularni hech kim tanimaydi.

                            * * *

Yomonlikni unutish kerak, ammo yomonligini emas. Yomon yomonligini davom ettiradi. Ilon hech qachon zahrini sochishdan qaytmaydi. Shu bois kim yomon ekanligini bilib qo'yish, yaxshini yomondan farqlay olishda as qotadi.

                             * * *

Xotin go'zal bo'lsa – erda qo'rquv bo'ladi,

Xotin xunuk bo'lsa – erda armon bo'ladi,

Xotin aqlli bo'lsa – er boy bo'ladi,

Xotin aqlsiz bo'lsa – er xor bo'ladi.

                            * * *

Xalqlar urushi – insoniyat palagining qurishi.

                            * * *

Isaak Nyutonning boshiga tushgan olma har kimning ham boshiga tushadi. Ammo hamma ham Isaak Nyuton bo'lmaydi. Demak, sir olmada emas, boshda.

Alisher TOIROV