Yosh ijodkorlar seminari — iqtidorlar fabrikasi
Jazirama yoz ham kirib keldi. Deyarli barcha ilm maskanlarida o'qishlar yakuniga yetay deyapti. 9-10 oy davom etgan ta'lim jarayonlaridan so'ng ta'tilni kim qanday o'tkazmoqchi? Shaxsan men ta'tilni Zomin tumanida joylashgan “O'riklisoy” oromgohida o'tkazishni niyat qilganman. “Ohho, ishtahalaringiz karnay-ku, pulingiz shunchalar ko'pmi?” deyishingiz mumkin. Yo'g'-e, men Zomin seminari ishtirokchisi bo'lib ketishni maqsad qilganman. Xo'sh-xo'sh, buning uchun nima qilish kerak deysizmi? Javobi oddiy! Shunchaki tinmasdan ijod qilasiz!
Bugungi kunda ijtimoiy-ma'naviy sohalardagi islohotlardan ko'zlangan maqsad xalqimizning ma'naviy yuksalish yo'lidagi imkoniyatlarini kengaytirish, jamiyatda ma'rifatparvar, ziyoli qatlamni shakllantirishga qaratilgan. Shu o'rinda yosh ijodkorlarni qo'llab-quvvatlash, ularning ijodida yangi qirralarni kashf etish maqsadida har yili respublika Zomin seminari o'tkazib kelinadi.
O'zbekiston Respublikasi Prezidenti Shavkat Mirziyoyev tashabbusi bilan Zomin tumanidagi “O'riklisoy” oromgohida yosh ijodkorlarning Zomin seminari bo'lib o'tadi. Yoki ushbu seminar Toshkent viloyatida joylashgan ijodkorlarning Do'rmon bog'ida, yoxud yurtimizning boshqa go'zal tabiatga ega maskanlarining birida ham o'tkazilishi mumkin. Eng muhimi, bunda 19 yoshdan 30 yoshgacha bo'lgan ijodkorlar hududiy saralash orqali aniqlanadi. Seminar 7 yo'nalishda o'tkaziladi. Bular: nasr, nazm, dramaturgiya, badiiy publitsistika, badiiy tarjima, bolalar adabiyoti, adabiy tanqid.
Hozir seminarning hududiy saralash bosqichi ham o'z nihoyasiga yetay deb qoldi.
Joriy yilning 5 iyun sanasida O'zbekiston Yozuvchilar uyushmasi Sirdaryo viloyat bo'limi tomonidan tashkil etilgan seminarda Sirdaryo va Toshkent viloyati yosh ijodkorlari uchrashdi. Tadbirda Sirdaryo viloyati hokimi Akmaljon Maxmudaliyev, Yozuvchilar uyushmasi o'rinbosari Botir Ergashev, O'zbekiston Xalq shoiri Mahmud Toir, O'zbekistonda xizmat ko'rsatgan madaniyat xodimi Hayotxon Ortiqboyeva, O'zbekistonda xizmat ko'rsatgan madaniyat xodimi Bobur Bobomurod, O'zbekiston Yozuvchilar uyushmasi a'zosi Qozoqboy Yo'ldosh, O'zbekiston Yozuvchilar uyushmasi Toshkent viloyati bo'limi bosh mutaxassisi Zohidjon Olov, O'zbekiston Yozuvchilar uyushmasi harbiy-vatanparvarlik bo'limi boshlig'i Ma'mura Ergasheva va bir qancha adabiyotshunos va murabbiylar ishtirok etishdi. Saralash bosqichida ustozlar tomonidan ishtirokchilarga juda ham qiziq va foydali maslahatlar berildi. Ustoz-shogirdlik an'anasini davom ettirgan holda ishtirokchilarning orasidan hakamlar hay'ati a'zolari ba'zilarini o'ziga shogird qilib ham oldi. O'rtada bo'lgan shaffof raqobat va do'stona muhitda hamma o'zi uchun tajriba va ko'nikmalar oldi.
Shu kabi tanlovlar o'tkazilar ekan, o'sib kelayotgan avlod ham ma'rifatga ergashadi. Ko'proq ilm oladi, kengroq fikrlaydi va o'zi kabi ijodkorlar bilan tajriba almashadi. Ana shunday qilib yetuk shoirlar, xalq mehrini qozonuvchi yozuvchilar, Ozod Sharafiddinov kabi yetuk adabiy tanqidchilar, Abdulla Qahhor, Shukur Xolmirzayev singari mohir hikoyanavislar adabiyotning keng maydoniga olg'a va shahdam kirib kelajak.
Dildora DO'SMATOVA,
O'zJOKU talabasi